角色名容易入屋，就好似“海潮”等于温碧霞、“初哥哥、Cool魔”等于张智霖、“阿灿”等于廖伟雄……到今时今日，就有大小姐“龙力莲”同林淑敏密不可分，就好似碧咸同七旋斩、罗拔唐尼同铁甲奇侠一样唇亡齿寒。

入行16年的林淑敏演过无数路人甲乙丙同阿妈角色，加上做《都市闲情》主持，佢个样入晒脑但噏唔出佢个名。直到“大小姐”上身，呢个强势兼麻烦，跟潜藏性格相反嘅女上司，唔经唔觉令林淑敏个名成功入屋。大小姐有别于“细契”关菊英、“万贵妃”车婉婉呢啲巴渣角色，因为大小姐够贴地、够人性化，观众会谂：“系喎！我公司个女魔头都系咁Ｘ烦，但佢系惨嘅，冇人敢要！”

乾坤挪移 愈难愈爱

女上司份人工包埋演戏，你总要有啲巴渣、强势同硬净。人前女权显威风，人后寂寞背人垂泪，林淑敏未至于演得淋漓尽致，但确实将大小姐变成一个有血有肉嘅人，大小姐爱下属送水辉，完美演绎可能永远系最遥远的距离，连Nuts哥都真系睇到眼湿湿。
女强人都系女人，都希望搵番个男人。现实中林淑敏同大小姐恰巧180度大挪移，因为佢可以搵到一生中最爱。2010年，林淑敏不幸患上乳癌，一夜晴天霹雳，为咗唔想拖累当时仍系男友嘅Tommy，更一度劝走对方，但Tommy冇话因为女友患癌间隔着距离，无惧世事变改，实行愈难愈爱。

抗癌路绝不易走，一夜脱尽青丝事小，心灵意志体力耗尽先最摧心折骨，Tommy不离不弃，一直在旁悉心照顾同支持。2013年佢哋终于步入教堂，婚礼冇搞大龙凤，只有我和你，简简单单你的名字我的姓氏。有人话一个家要生小朋友先够完整，林淑敏想生B，但原来只系自己想太多，Tommy认为一个完整嘅家，就算只得两个人都已经好开心。

权衡利弊 只怕万一

其实林淑敏一位闺蜜讲过，佢做咗几年荷尔蒙治疗，医生见佢身体状况唔错，都有鼓励佢生B，但林淑敏认为自己年纪渐大，冇足够精力去照顾小朋友，亦未知身体之后会出现乜嘢变化，如果出现万一，对BB同老公嚟讲都会好惨，权衡各种利弊，最终放弃生小朋友念头。话虽如此，林淑敏一生最大遗憾，正正系未能生儿育女。

大小姐与林淑敏密不可分，偏偏佢哋系两类人，亦系同一个体。有人渴望去爱，有人祈求被爱。尽管大小姐炼成林淑敏人气，但林淑敏远比大小姐幸运，因为有人去爱，不是吗？

点阅读原文