歌手何韵诗的户外演唱会进行得如火如荼，不过昨晚遇上大雨，阿诗冒漏电之危与歌迷齐齐湿身，原本企在台中献唱的她早被雨水撇湿，眼见台下歌迷愈淋愈兴奋，她即豁出去主动走出台前，被淋到满头雨水的她继续滴住唱，歌迷就愈来愈High及跳来跳去，他们又担心偶像乐极忘形会跣低，所以不停大叫小心，但超High的阿诗似乎听唔入耳，像小孩般冲到台边玩水，成个大细路！由于演唱会还有三场，工作人员为免阿诗感冒，完骚后即用毛巾包住她。

阿诗承认违反制作组要求，她说：“真系超级大雨，其实制作组都好担心，千叮万嘱我落雨就企喺有嘢遮嘅地方，不过见淋到半湿，索性行出去同歌迷一齐淋雨。（唔怕咪漏电？）系有机会嘅，其实结他、咪同各样嘢都有机会淋坏，都唔理得咁多，成个感觉好似ColdPlay（英国摇滚乐队）演唱会咁，喺香港好难有咁嘅气氛底下开骚，其实有部分器材都淋坏咗，好彩冇影响流程，好顺利完成个骚。”她随即大赞观众说：“佢哋冇话走，全部人玩得好开心。（唔怕歌迷淋病？）今朝已经叫歌迷自备雨褛。”问到骚后是否冲个热水凉保暖？阿诗笑言内功深厚及宿命：“冇事，反而愈唱愈㷫，超High，系冻嘅，不过一路唱一唱跳，加上内功深厚，我都系嗰啲遇到大风大浪就会发挥小宇宙嘅人，我条命系咁。”