由艺人郭晋安、罗嘉良及陈锦鸿主演的无綫剧《创世纪》于1999年播放时，掀起追剧潮，就算之后重播，依然有好多观众捧场！事隔19年，无綫再推出重头剧《再创世纪》，令一班剧迷引颈而待。而今次无綫与爱奇艺合作，内地寻日已经播出咗，相反香港9月10日先有得睇！

剧集一开首就由周励淇孭飞表演街头舞蹈，之后就开始入正题，剧情讲述郭晋安饰演嘅贺天生，系一个非常有心计嘅人，想借住金融风暴吞并胡枫嘅集团，身为贺天生女友嘅杨怡，虽然系胡枫契女，但佢不但冇阻止男友，仲帮埋一份，借关心胡枫之名，查实收风为实，仲睇住胡枫个败家仔黄子雄，一步一步咁推公司走上绝路。好彩喺潘志文同林文龙帮助下，总算挨过难关，之后剧情讲述郭晋安继续用尽各种方法，誓要爬上首富呢个位！

因为套剧啱啱开始，好多人物要铺排出场，暂未知追剧指数有几高，不过，套戏首集已经有好多靓景睇，去到布拉格、温哥华等地拍摄，而今次打锣打鼓话会做奸人嘅郭晋安，真系连笑都奸到出汁，睇到人心都寒。而锺嘉欣首集亦已经出场，但演出暂时冇乜大惊喜，反而杨怡就畀人感觉奸得嚟又唔算太乞人憎，相信又会掀起一波追剧潮！

对于今次角色奸到爆，郭晋安觉得好特别，并谓：“尝试下唔同类型嘅角色都好呀。（惊唔惊观众讨厌？）呢套系一出大型制作，台前幕后都放咗好多心机落去，作为演员当然好希望有好嘅剧集，畀大家去欣赏。（会唔会担心观众讨厌？）咁呢个要问番观众，但喜欢我又好，憎我又好，我都会尽力做番好自己嘅本份，接唔接受就交番畀观众去决定啦。”