图、文、音：麦小姐
歌曲：万芳《爱，禁不起考验》
台风又来了，秋天个台风，一阵一阵个紧，暑气老早“闻风而逃”了，就剩下来了“凉”。还好，雨落得还算客气，呒没拿热情彻底浇隐脱。搿种阴势怪样个天气，最好是匽起来啥都覅做，弄杯热个饮料，看本勿动脑筋个书，听听音乐，勿赶辰光。今朝麦小姐想脱大家讲讲一个我交关喜欢个女歌手，伊叫林万芳，艺名万芳，1967年生于台湾。勿查勿晓得，伊今年也已经五十岁了。尔冬升埃部著名电影《新不了情》个主题歌，大概是伊传唱度最高个一首歌了[口伐]。不过，我对搿首歌倒是呒没啥特别个偏爱，也可能是听了忒多，审美疲劳了。
万芳辣伊早期个“左手演唱会”高头，唱过一版《试着了解》。我记得伊好像是坐辣台沿浪向唱个，一遍又一遍重复副歌个部分，既像对话又像独白，每一遍个情绪表情侪勿一样。也就是辣看过搿段表演以后，让我对搿首《试着了解》有了特别个好感。试着了解，千万覅去看歌词，埃个里向有一个骄傲女子因一场勿得志个情爱而生出个戆劲，包括了自卑委屈忍气吞声，但，就算是搿能，仍旧舍勿得放手。
万芳长了一般，伊个外形辣女歌手里向并勿具有多少优势，不过，辣埃个还呒没介浮躁个年代，大家还是愿意拨有才华个人一个舞台个。万芳个歌从来勿属于“傻白甜”个类型，创作人们也总归放心拿一点有孤傲感个歌交拨伊。尤其是近几年，伊个气质越加清冷，舞台腔越来越重，好像已经勿在乎歌曲个传唱度了。万芳个音色里有种碎裂个美感，外加随了年岁个增加，伊个碎裂越来越缥缈，直到接近虚无。或许是唱歌搿桩事体对伊来讲，已经超越了表演，而变成功表达个一种形式。我倒是蛮想看看万芳脱田馥甄一道同台合作个，因为我觉着搿两个人现在个“频道”，交关搭调。
1992年，万芳推出了《真情》专辑，里向收录了一首叫《猜心》个歌，填词十一郎，作曲张宇，隔过一年，王靖雯唱了伊个广东话版，叫《如风》。万芳个声音温度其实是比较冷淡个埃种，所以，伊就算是唱热恋，也赛过是“熔岩蛋糕”，正好帮菠萝油相反，外表勿动声色，但内心滚烫翻腾，一定要有个缺口再可以敞开来倾泻。而搿只缺口，是伤。我是一个迷恋精神痛感个人。
一首女人写拨女人唱个歌，猜心，顾名思义，猜测心事。歌词里有画面感，如果拿伊拍成照片，是“貌合神离”：一间勿大大个房子，两个沉默个人，“我”看“侬”，“侬”想“伊”。窗外有霓虹灯个光透进来，投影如墙，清清爽爽划出了两个世界。我想勿出除脱万芳，还有啥人可以拿搿种情绪唱得介贴切介孤清，勿哭勿闹也勿强颜欢笑，但是让阿拉从伊个声音里，看到了一颗用丝线缝补过个心。
2002年，万芳出了《相爱个运气》（（相爱的运气））专辑。我买过搿张CD，盗版个，好像是辣延安路高架底下个摊头高头淘着个，专辑封面是女歌手个大头照，画风鲜艳明朗。专辑里向，让我印象深刻个有两首歌----《铁罐咖啡》脱《勿确定》（《不确定》），搿两首风格反差明显个歌曲，一冷一热，一慢一快，万芳一记头就跳出了我原来印象里已经根深蒂固个苦情模式。勿一定要情深如海，勿一定要非侬勿可，勿一定要欢乐今宵，也勿一定要灌醉自家，伊个埃把声音自然个展开来，或者狡辩或者装戆或者与寂寞为敌，听得出真心流露个情绪，也叫耳朵交关适意。
《勿确定》（《不确定》）搿首歌是万芳填词、吴俊霖作曲个，公路风格，节奏轻快洒脱，像一场呒没目的地个旅行。搿首歌个基本格调就是“年轻”了，但歌词个大概意思偏偏是关于“冷却”个，搿种“冷却”，脱干干脆脆个“拒绝”比较起来，还是多了一口“回头气”。是个呀，伊讲伊勿确定搿个勿确定埃个，要爱情也要世界，要自由也要安定。做人哪能可以介贪心呢，年纪轻个辰光侬自说自话个想哪能就哪能，看到各种“勿确定”个变数帮憧憬，乃末想当然个觉着对方也是搿能认为个，所以侬个离开对伊来讲也是“解放”。其实，真个，未必。
勿是要帮啥人啥人交代清爽来龙去脉再可以叫“理直气壮”，阿拉，最多只好代表阿拉自家来发言。自家讲自家个真心想法，关键个关键是，就算侬有一千条“勿确定”个推脱之辞，但对侬自家来讲，还有要有一个“了断”个分寸个，也就是，埃只“确定”个答案。答案总归是勒辣埃面搭个，讲看勿到伊个人，只不过是不想认账而已。
写了几首万芳个歌，最后一只位置，我想挺拨我最最欢喜个伊个埃首作品，名字叫做《爱，禁勿起考验》（《爱，禁不起考验》），来自《割爱》专辑。也蛮奇怪个，我介欢喜搿首歌，但让我一本正经为伊写大段大段个言话，我倒是闷脱了。讲一只情景好了，其实脱搿首歌曲个本来意思也呒没啥个搭界。有一年冷天色，我刚刚进入新个工作单位，脱同事还勿大熟悉。加班，一家头出去吃夜饭，天交关冷，我插了耳机，随机放点音乐解解厌气。齐巧听到搿首万芳个歌，路灯照亮埃条勿算长弄堂小路，我恍如梦醒。
最后，我想用之前辣私人歌单里向，写拨《爱，禁勿起考验》（《爱，禁不起考验》）搿首歌个几句言话做结束。“勿擅长奔跑跳跃飞翔也勿要紧，因为晓得生活里，即使呒没风雨，也总有无常”。
（原文写于2016-2017，修改于20170915）
我们最近还发过：
【麦唐作】即“麦小姐”和“唐厂长”的作品，是以沪语（语音口音偏上海市区音；文本表达参照钱乃荣《上海话大词典》）为主打的原创方言专栏。文体、形式自由不羁，力求“做得开心，听得满意”。
“麦唐作”又取“卖糖粥”之谐音，愿为众友献上一份带着生活回甘的“地气美食”。
本公众号发布内容（包括文字、音频及未注明“来自网络”的图片）皆为原创，作者保留对作品的著作权。未经授权允许，不得擅自转载。
如有需要转载或其他工作邀约：
可添加微信号：Leslie_0207
多谢您的支持和欢喜！
感谢您的支持鼓励，我会继续努力的!
文章地址：
用户邮箱：
打赏金额：USDT
点击”去打赏“，即可进行打赏支持本文章哦
