音樂無國界，只要係好歌，有時就算聽唔明嗰種語言一樣可以感動人心。最近許志安為Pixar動畫《玩轉極樂園》配音，兼獻唱粵語版主題曲。安仔呢日喺IG轉載一篇KOL偽文豪寫嘅留言，原來佢發現呢首歌官方MV有唔少來自墨西哥嘅留言，大讚安仔唱得好好，甚至比西班牙文版本更精彩！呼籲大家珍惜香港其實仲有好多好歌手！

許志安為Pixar動畫《玩轉極樂園》配音，兼獻唱粵語版主題曲。

睇返《玩轉極樂園》粵語版主題曲MV，的確見到好幾個墨西哥網友留言，佢地似乎一開始唔知道係咩語言，留言問：「What language is this? sounds beautiful」有網友用英語回覆係廣東話之後，佢就話：「It's a placer! Greetings from México!」亦有西班牙文留言：「難以置信的版本，這是非常美麗的演繹。表達了很多的感覺。(Increíble versión, que forma tan hermosa de interpretar. Se expresa mucho sentimiento. Gracias.) 」

勢估唔到粵語版電影主題曲，可以得到墨西哥網友越洋支持。(網上截圖)

相信連安仔自己都估唔到，唱隻電影主題曲可以紅到去世界另一個邊端，佢喺IG留言話：「衷心感謝你們支持。」其實正如偽文豪喺留言中所講：「香港人我哋都有好歌手，唱得好要讚、要支持，唔好人哋出外搵食喇，唔撈喇，死咗喇，先嚟珍惜……而家唱得好就要讚，咁先係正確態度！」

許志安轉載留言，感激大家支持。(IG截圖)