撰文： 洪曉璇

發佈日期：2018-02-06 08:00

以前唔係人生大事例如結婚、擺大壽，都唔會勞師動眾搵專業攝影師影相。隨住攝影普及化，婚紗相都可以影十輯八輯，仲有近年流行嘅大肚相以及初生嬰兒照。官恩娜公開囡囡BéBé A 「模特兒初體驗」靚相，又扮熊仔又扮蠶蟲相當可愛﹗其他星媽星爸都有趕潮流幫bb留倩影，原來影NewBorn Baby已經成為新熱潮啦﹗

官恩娜囡囡BéBé A真係相當可愛 （官恩娜Facebook）

陳敏之都有同囝囝影初生BB相。（陳敏之Facebook）

近年興起初生BB攝影潮，價錢由幾百蚊至近萬蚊不等，分為到影樓拍攝或上門到家中拍攝，好似官恩娜幫襯呢一間，上門到家中拍攝，包晒BB衫仔同道具，最平嘅拍攝套餐30分鐘要價近6000港元。雖然依家人人拎住部手機都可以隨時影相，不過專業嘅初生BB相其實唔係㩒個制咁簡單。

蠶蟲造型相當可愛，張名雅囝囝Mario就化身做藍色蠶蟲。（張名雅Facebook）

外國早已流行NewBorn Baby拍攝，攝影師Irene就曾經遠赴澳洲學習當中技巧。（受訪者提供）

曾遠赴澳洲跟名師學習New Born拍攝技巧嘅攝影師Irene Chui 就話，其實初生BB相喺外國早已流行：「上門定影樓視乎客人需要，比較傳統覺得坐月唔方便出門會Book攝影師上門，如果想有多啲道具可以到影樓，其實都有齊照顧BB嘅用品和設施。」相中BB又要托頭，又扎埋一舊，大家都會相當擔心會唔會扭傷BB。Irene就話其實唔使過慮嘅，因為呢啲動作都係模仿緊BB喺媽咪肚入面嘅姿態：「初生嬰兒身體比較柔軟而且入睡時間較長，所以會待他們熟睡身體放鬆才會擺姿勢。絕不會硬屈他們手腳。」

好多新手父母喜歡揀選嘅蠶蟲造型，原來會令BB有好大安全感。（受訪者提供）

影后鮑起靜都曾經搵Irene，幫外孫女影NewBorn靚相。

大家睇相可能會奇怪點解BB通常瞓緊覺，其實都係有原因嘅﹗影過數以百計初生BB相嘅攝影師Irene就表示：「影呢類相最好喺BB出世後首兩星期拍攝，當中以7至14日期間最好，因為呢段時間皮膚最幼嫩，出生時嘅暗粒同面黃都漸漸消失，而且BB九成時間都瞓緊覺，而且不難發現佢地會喺睡夢中忽然笑起嚟，所以呢段時間影出嚟嘅相會特別可愛。」

攝影師Irene表示出世首兩星期係影NewBorn嘅黃金時間，BB好多時會瞓瞓下笑出嚟，相當可愛。（受訪者提供）

初生BB相最好喺出世後首兩星期拍攝，好似官恩娜囡囡就係11日大做小Model啦。（官恩娜Facebook）

葉翠翠囝囝Jack出世十日時拍攝。（葉翠翠Facebook）

張名雅囝囝Mario

張名雅囝囝Mario

陳敏之及囝囝

陳敏之及囝囝

葉翠翠囝囝

葉翠翠囝囝

葉翠翠囝囝

葉翠翠囝囝

關心妍囡囡

關心妍同老公帶埋囡囡影全家幅