撰文： 黃梓恒

發佈日期：2018-02-06 19:35

《平安谷之詭谷傳說》今個星期迎來結局篇，鄭子誠飾演的賈東陽作為一個西醫被村民當成獸醫，因為對妻子的思念，竟將女兒（由簡淑兒飾演的賈淼淼）當成自己的妻子，險成亂倫之禍，幸好及時出現了北杏（沈卓盈飾），兩人亦因此產生了感情。子誠當初由《真情》李子浩而出位，不過卻是奸出位，觀眾對他大罵特罵，自此一個「奸」字與他形影不離，「陰謀情人」（改自他主持的港台電台節目《音樂情人》）和「完美奸人」等等稱呼亦隨之而出。

點解小編覺得佢係對住鏡頭奸笑？（林迅景攝）

「御用奸人」學溫兆倫深藏肝氣

作為一個TVB御用的奸人，子誠當然都會用自己借鏡的對象，他說出了3個名字，3個現在都好少在TVB出現了，分別是任達華、溫兆倫和羅嘉良。尤其是溫兆倫更影響得他深遠，他說：「我都會留意大家點去演繹唔同嘅方式，大家知己知彼，互相學習。第一我自己最鍾意係任達華，當年佢喺TVB做嘅奸角係非常出色，一直都係我嘅學習對象。另外一個係溫兆倫，佢嗰種表面無嘢但內裏極度陰險，某程度上我都係喺佢身上學返嚟，哈哈！佢本身個樣唔係大奸，你諗佢靚靚仔仔斯斯文文，但係內裏面蘊藏住嘅嗰種奸氣，一爆發就會殺你一個措手不及。呢兩個我會係好鍾意睇，撈家（羅嘉良）都係做得好正。」

相信後一輩嘅演員，都會睇子誠學做「奸」。（林迅景攝）

沒有最奸　只有更奸

由1996年加入TVB，第一份工作是擔任《城市追擊》主持，當時因為得到監製徐遇安賞識而被邀請加入《真情》。多年後，子誠其實都想重操故業，做返主持，曾經試過向公司提出，但TVB卻希望他奸人的味道退一點才做其他東西，他說：「點知不但止洗唔到，仲要累積，所以都唔會諗呢樣嘢。我有諗過做好人，但我記得我當初拍《真情》，子浩本來係個好人，但監製覺得我眉宇之間帶點奸意。同埋好人難做，一個奸人一定係有一件事令你奸，特別我哋呢啲無深厚戲劇訓練出身嘅人，有事件帶住你去做，會易做好多。因為好人好多時係等事件發生，被動地接受，對我嚟講係好困難，我唔會介意繼續奸落去，應該咁講，沒有最奸只有更奸。」

做奸人入晒血，子誠話自己做得最好嘅好人角色係《四個女仔三個BAR》嘅任雋燁。（林迅景攝）

奸都要爐火純青　被罵便是「入屋」

如果揀TVB現役奸人，子誠會揀李國麟和李成昌，他說：「我睇住佢哋大，佢哋爐火純青到一個地步係，做好人你會覺得佢好可憐，衰起上嚟你又覺得佢十惡不赦，呢啲咪成功囉。即係好似我做好人你唔會覺㗎嘛，呢個就係我嘅遺憾，佢哋成功地方就係做咩角色都俾人覺得係嗰個角色，如果你俾我做個好人，啲人依然會覺得我會放火。」

李成昌與李國麟呢兩位絕對係好戲喇！（tvbusa.com）

一個演員，如果入戲入得太深，觀眾對他的印象自然會跟着該角色而形成，幸好近來大家都知道子誠這一面只是演出來，但當年初出道時形象難免被人覺得是壞人，甚至有人當街指責他，「呢啲成日都聽，但而家少咗嘅，最聽得多當然係《真情》嘅時候，啲人根本唔會同你講嘢，只會俾個不屑嘅眼神你。當時個角色係拋妻棄子，任何一個身為人阿媽都唔想仔女變成咁，行出街見到啲阿媽，佢哋個眼神都幾難頂，絕對feel到佢白眼我，佢唔會講粗口嘅，但佢會同個仔講呢個係衰人，唔好學呀。最慘係我聽到，呢啲事喺《真情》期間成日發生，我都好難避免，因為太入屋喇。」

下一集會同大家講鄭子誠如果看香港電視業，密切留意！

想睇《平安谷之詭谷傳說》更多訪問？

鄭子誠如果做喜劇角色應該真係幾好笑！（林迅景攝）