歌手周柏豪近年三线发展，发展唱歌事业之馀，亦踏入影坛拍戏又拍剧，密密做忙到爆。咁辛苦梗系要奖励吓自己，早排柏豪被发现换咗新车，唔知系咪架车太抢眼，最近又被网民“捕获”。

有网民喺社交平台表示见到柏豪架车泊咗喺街尾，令随后嘅旅游巴唔够位置驶入，并留言话：“有冇人识周柏豪？快啲叫佢返嚟揸走部车。”该网民仲影埋架车兼摆上网，相中清晰见到车牌号码，以柏豪自家品牌嘅名命名，唔怪得咁易被认出啦！虽然柏豪被指阻塞道路，但亦有网民为佢平反，指睇番现场情况，似乎系旅游巴司机嘅技术问题，未必关柏豪事嘅。

当正新车系“二奶”的柏豪接受东网访问说：“我当时喺架车度，睇住一个人影，我亦冇阻挡架旅游巴士，网上嘅嘢有时唔需要太认真，咪当笑料一则，大家轻松啲啦！”问点解会有人影他相？柏豪说：“可能我架车靓，正常人都会影，哈哈。”他又强调没有阻街，他说：“嗰度系酒店落客区，我停咗喺度，但嗰度唔系双黄线，可以停车！”他表示冇计自己停车几耐，而旅游巴都成功离开，问题已解决。

柏豪回应完事件，嗰位开Post嘅网友即时再留言指有人讲大话，佢留言：“泊完架车就同条女行左（咗）入去恒丰中心方向，过左（咗）5分钟旅游巴就到，转唔到湾（弯），呠左（咗）5分钟都唔返嚟，我先落车影相，虽然周生架车系黑玻璃，我都行近睇过一定系冇人喺架车入面，跟住架旅游巴前前后后好多手先走得甩。”另外，又有网友指同周柏豪亲戚了解过，话部旅游巴只系停低上落客，指柏豪架车冇阻住旅游巴转弯。

点阅读原文