艺人陈法拉于金钟出席品牌活动，活动上佢同好友杨洛婷（Rabeea）同场，即兴奋表示好耐冇见，仲大赞对方做咗妈妈都keep住冻龄，场面搞笑。

提到早前导演处女作夺奖，佢表示系意料之外：“本身只系想试吓拍嚟自己玩吓，所以真系完全冇谂过，系好大嘅鼓励。（会唔会真系拍套长片？）其实我依家写紧个戏，系剧情片嚟，都会自已演埋，不过暂时都系筹备紧，要等写完先知啲细节。（做埋导演？）应该唔会，导演好多嘢要兼顾，比较难投入演戏。”佢续指会系一套外语片，并笑言写作进度可快可慢，希望可以2019年前完工，又话仲搵紧人投资，笑言可考虑申请政府资助。

至于讲到演员方面嘅工作，佢就透露月尾将会去内蒙古开新戏：“会同一位新嘅女导演合作，所以自己都好期待。（会同咩演员？）都系一啲香港观众比较陌生嘅演员。”佢续指届时当地天气寒冷，可能会达零下5度，所以会准备大量暖包。