艺人林师杰同欧阳巧莹（Tammy）今日结婚，林师杰就喺社交网率先甫出一班兄弟团嘅大合照，相中见兄弟团中有唔少圈中人，当中包括周志康、翟威廉、罗天宇、张明伟、麦秋成、杨潮凯以及谭俊彦等，佢哋仲清一色着上粉红色西装添！而林师杰亦以英文留言：“Leg out！”睇嚟佢哋已经整装待发，准备好出发接新娘啦！另一边厢，有份做姊妹嘅朱晨丽亦上载同蔚雨芯齐齐化妆嘅合照，实行以最佳状态向好姊妹送上祝福。

另外，有份担任兄弟团嘅罗天宇接受电话访问，佢表示同林师杰识咗好耐，所以心情好复杂：“同佢拍《爱．回家之开心速递》识到依家，睇住大家一齐成长，真系好似兄弟咁。佢系一个好有睇法嘅人，而且好锡我，所以佢结婚我都好感动、好戥佢哋开心。”罗天宇又透露一对新人比较新颖，冇做传统嘅接新娘仪式。