由黄智雯同袁伟豪主演嘅无綫剧《三个女人一个“因”》虽然被指喺炮灰档期播出，不过唔好以为咁样就毫无睇头，事关女主角黄智雯要一人分饰三角，真系少啲戏都搞唔掂。除咗黄智雯之外，喺剧中饰演黄智雯男友嘅陈智燊（Jason）都一样咁好戏，所以无綫嘅官方Facebook专页“See See TVB”就剪辑咗一段陈智燊喺剧中嘅精彩表现，而且仲加入唔少嘅恶搞元素，搞到一班网民都笑爆嘴之馀，仲话Jason可以考虑转去拍恐怖片。

Jason喺《三》入面饰演一个极级胆小怕事嘅男友，所以少少事都已经可以将佢吓餐死。所以Jason打开个衣柜见到陈展鹏弹咗出嚟之后，就即时吓到大字形咁瞓喺地，而片段中间加插咗张陈展鹏嘅相，搞到佢好似畀陈展鹏吓晕，认真爆笑！不过瞓地又算得系啲咩？最惊都系见到黄智雯，咪住！应该系夏蕙BB至啱，睇佢吓到即时弹开兼大叫之馀仲斟水倒泻水，就知一定唔系黄智雯吓亲佢啦！

喺剧中Jason最怕都系一个“高”字，由高处望落地下都头晕，就算幻想埋欧阳巧莹浸浴都搞唔掂，而且仲汗都出埋。因为Jason一谂到老婆宋熙年就咩都唔敢幻想，仲即时晕埋添！有网民都笑言Jason连滴汗都识做戏，相信佢一定系睇过《演员的自我修养》，仲有人话佢嘅反应吓人过恐怖片！