冇错，係变化，而家嘅Sammi最希望有变化。佢嘅心态改变咗，所以如今更快乐；佢嘅演法改变咗，所以更期待睇到自己嘅进步。

呢一年嚟，佢拍咗四部电影，今年年底陆续上映，佢直言唔再好似以往拍爱情喜剧咁样扭下扭下演戏，更享受演戏上嘅心理准备及排练，结果机会一到，成就咗佢十年来首次连拍几部电影嘅忙碌年。

越忙越快乐越幸福，上个月佢推出咗新唱片，日复一日出席公开活动，扬言自己状态大勇。至于梦想中嘅「大只Mi」，相信明年演唱会有望可见。

千年如一日，仲好似最初

千年如一日，仲好似最初由8月份开始，Sammi出咗新碟新歌，第一次举办Side Track演唱会，亦有至少四部电影排队上映，而且不断出席公开活动，几乎日日见报。我话Sammi状态甚好，佢笑住认同：

如果你问我，以我呢个年纪，我都应该算状态大勇！

唔经唔觉，佢今年都46岁喇，睇佢个样身形确实唔似，千年如一日，就如最初。

无论我嘅生理或心理状态，或者面对工作嘅热情，其实冇变，但当有更多适合我嘅好机会，就有更多让我表演嘅机会，更多发光发热嘅机会。有时候，就算我有好状态，却冇好好嘅机会，其实都没办法，但过去呢段日子机会唔少。

换句话讲，好快又会听到Sammi唱住：我在发热发亮……

我觉得仲未係最发光发热，等我呢几部电影上映之后啦，我仲喺度等待大家嘅反馈，好想知道我呢一种改变及进步，是否受到广泛性嘅认同。

好多人认为，而家嘅Sammi好幸福，无论爱情、事业、信仰、运动方面，同样得到满足。

我觉得每个人有唔同嘅幸福点，只要知足，就会感到满足及幸福。对好多人嚟讲，我亦都有好多不足之处，例如我决定唔生仔，都係唔幸福㖞，可见每个人抓住幸福嘅确据唔一样，但我已感到好满足及好幸福。

佢笑住话，佢学识咗喺唔同环境下嘅快乐真谛。

哪怕係唔太顺意嘅时间，我都会提醒自己要快乐同满足，呢个係心态上懂得快乐，多于我拥有D乜。

唔可以否认，Sammi嘅快乐来源，似乎越嚟越多。

我相信係经历所致，经过几年嘅抑郁，我唔想再经历嗰种感觉。当我知道自己开始陷入烦恼或似乎步向唔开心时，我懂得要将自己抽出嚟；第二，无可否认，信咗耶稣后，的确令我想法上改变好多，其中祈祷係重大帮助自己嘅日常习惯，无论开心唔开心，有何烦恼事情，或者咩事决定唔到，咩事情想感恩嘅话，我都会祈祷，令自己嘅人生轻省咗好多。

唔再扭下扭下

自从抑郁病愈之后，Sammi确实轻省咗。近十年来，每年几乎只拍一部电影，但今年底却已存咗至少四部。

严格嚟讲，我喺十个月内拍咗四部，真係好想拍电影，深深觉得几个剧本都好真实，呢D角色都可以令自己有好大变化。

冇谂到，现今公认为幸福快乐嘅Sammi，竟然求变。

每个人有时候都想求变，但必须有好多条件配合，所谓求变嘅过程，其实等咗好多年，呢几部电影嘅时机嚟得非常好。

佢进一步指出，希望喺演技上有真正突破同改变。

拍呢几部电影之前，例如《失恋急让》、《合约男女》等等，都想有D变化，但最终未必能够，直到呢几部真係一个时机。

譬如以前演爱情喜剧，有时都係到现场由心而发，你知道杜Sir（杜琪峯）真係冇剧本，埋位时凭着直觉去演戏，有时会自己傻大姐一面流露出嚟。但呢几部电影好唔一样，竟然有个好完整嘅剧本，对于其他演员嚟讲好正常，但我却觉得好有新鲜感，原来我可以做到更多嘅准备工夫。

正如即将上映嘅《圣荷西谋杀案》，佢好早就喺屋企排练好多次。

基本上去到现场，好似第一次演出，但其实每一场戏都已经演过，早已彩排咗好多次，同以往演爱情喜剧嗰种由心而发嘅本质演出，真係好唔一样，今次唔可以好似以前郑秀文扭下扭下嘅演戏，却有更多预定性嘅身体语言，感觉好唔一样。

佢强调，呢两种演法其实冇高低，但到咗佢呢个阶段，就係追求唔同，而唔係一种纯粹率性的嘅演出。

首拍心理悬疑片

提到《圣荷西谋杀案》，电影由得奖舞台剧改编，讲述两宗发生喺圣荷西嘅凶案：多年前，男女主角喺异乡合谋杀害女方嘅前夫，再由奸夫顶包饰演丈夫，人财两得，直至多年后，妻子嘅旧同学探访，奸夫竟想到叫佢取代妻子，再嚟一次借尸还魂……Sammi直言，呢个剧本及妻子嘅角色非常吸引佢。

剧本係重点，因为我未拍过呢一类心理悬疑片，而且我嘅角色都有好多变化。

至于原本嘅舞台剧，佢未睇过，更係刻意咁唔好去睇，担心会先入为主。

当然，我知道之前角色係刘雅丽所演㗎。

当年刘雅丽凭此剧夺得最佳女主角奖。

佢得奖与否，对我是否接受呢个角色，一D关系都冇，而我更刻意避睇咗之前演员嘅演出，畀做一个既定模样，好惊呢种感觉。

有趣係，呢次呢部电影嘅导演係潘源良。翻查资料显示，两人喺好多年前早已合作，却係《爱的挽歌》及《谈情说爱》嘅时期。

最大唔同係，大家能够好实在咁相处一段时间，始终填词人交完歌词，几乎唔使见面，唔使一齐吃饭，但呢次真係可以好认真咁首次认识呢个人。

佢认为喺呢次合作过程中，睇得出潘源良係个绝对感性嘅人，亦睇得出佢作为导演嘅能力，对呢位导演非常信服。

为广东歌做事

由音乐到电影，上月Sammi推出咗新碟《Believe in Mi》。有趣係，佢向来有唔少歌曲同相信有关，例如《信者得爱》。

其实我冇刻意想讲D咩，但上网听到呢首西班牙歌《Creo en Mi》，好好听，加上有个Mi字好得意，翻查后先至知道呢首歌嘅意思係「相信自己」。上天赐咗呢首歌俾我，而呢首歌嘅命题确实好适合我去唱，我一世人经常喺呢个命题入面努力，不停相信自己、完善自己。

Sammi笑言，大家都好似觉得佢唱呢个命题嘅歌，特别贴切。

我唔知点解，可能我个人够老吧，唱这D命题嘅话，特别令人信服！

唔只呢个命题，其实Sammi唱广东歌亦都好触动心灵，更令我谂起，好多同佢同辈嘅香港女歌手都北上发展，参与真人秀或音乐节目，佢却继续推出广东碟。

对我嚟讲，好多同辈歌手北上发展係好自然不过嘅事，我冇刻意抗拒，亦都冇刻意唱更多广东歌去抗衡。我只係好自然咁觉得，广东歌係我由细听到大，咁多年来，广东歌亦都带俾自己好多嘢，加上我真心觉得自己唱广东歌好听，所以先至会继续做呢件事。

讲完呢句，大家都笑咗，但Sammi心入面却係带D忧伤。

作为经历广东歌多年嘅香港歌手，如果唔去为广东歌做一D咩，我真係惊佢会失传，可能真係有咁样嘅一日，但我更唔想呢件事发生喺我仍有能力做一D事嘅时候。我唔想将来回望时，当初我冇为广东歌做过任何事。

明年演唱会见

广东歌嘅未来，大家都未知结果，犹幸此时Sammi有好消息宣布：明年开演唱会！

下年有个大项目，就係演唱会。演唱会一到，乜事情都要行开，当我做完呢几部电影宣传后，就要思考演唱会嘅事情，每次都会花上自己好多嘅心血。

啱完成Side Track演唱会，对筹备红馆大型show，有冇影响？

两种形式唔一样，亦都係两种观众。睇我大型骚嘅观众，可能好多都唔係我嘅铁杆粉丝，甚至唔识我嘅歌曲，只係入场睇骚，睇睇气氛点样，係咪热闹好玩，有否烟花等等，所以做大型骚有好多多考量，要顾及每一个观众嘅情绪。

佢认为大show讲求娱乐性，小show则偏向纯音乐性。

不过完成嗰次纯音乐性嘅音乐会后，我都想将纯音乐性嘅精神，带入娱乐性嘅演唱会，可能唔会样样都以观众做出发点，做一D自己想做嘅东西。

关于Sammi演唱会，我唔关心歌曲安排，我最担心嘅係，买唔到门票！

作为歌手，堵截黄牛飞嘅问题，真係无计可施，始终係自由商业市场。反而我觉得政府应该加强惩罚，变相有阻吓作用，例如规定吸烟会斩手指嘅话，大家可能会惊，所以刑罚大一点，或者有用。

最重要係，尽快搞好买票入场嘅措施，否则就冇机会睇到完全进化版嘅「大只Mi」啦。

撰稿：Nic Wong

粤语翻译：DD