花弗曾國祥拖婚黃宗澤攝位速食王敏奕

25歲的王敏奕與曾志偉大仔曾國祥拍拖三年半，人前人後sweet到爆，花弗成性的曾國祥今次算長情，不過講到結婚一於拖字訣，有心但冇計劃。近年兩人又聚少離多，感情似有暗湧。今年5月，王敏奕與黃宗澤(Bosco)合作拍網劇《飛虎極戰》，二人演情侶日對夜對，出事亦唔奇。日前王敏奕在糖妹與陳瀅扶實步出Bosco在九龍城開的蠔吧，飲大咗的王敏奕在街頭失控爆喊之際，Bosco竟從佢身旁極速跑落樓竄上車，完全當對方透明，實在好離奇！

王敏奕曾國祥聚少離多

王敏奕四年前在無綫播出的劇集《M Club》演嫩口李麗珍，清純外表夠煞食，未幾即馴服曾志偉大仔曾國祥，拍拖不久已進駐男友位於九龍塘的寓所同居。近年王敏奕演出機會不斷，曾國祥亦全身投入導演工作，二人戀情看似穩定，不時孖住出活動及互撐對方有份參與的電影，而且女友又得屋企人歡心。但近年曾國祥專注在台灣發展，二口子聚少離多，對於婚事又拖字訣，難免出事！

王敏奕《飛虎極戰》遇Bosco

今年5月，王敏奕參與網劇《飛虎極戰》，與Bosco合作做飛虎隊內的一對情侶，遇上情場老手，入世未深的王敏奕自然難以抵抗！據知兩人拍足4個月日見夜見，一拍即合，劇組人員見佢哋好到一杯嘢飲share，放工仲成日約埋去Bosco間蠔吧飲酒擦蠔。男友不在身邊，女仔芳心最脆弱之時，就最容易被人乘虛而入啦！

早前兩人在西貢市拍劇，拍完後王敏奕好自然走上Bosco架保母車換衫，男方就好識做咁企在車外護花。親密到咁？

交換口水冇問題

王敏奕與Bosco戲裡戲外不時打情罵俏，不時黐到實，仲會同飲一杯飲品，嘢食你一啖我一啖，交換口水完全唔覺有問題喎！

王敏奕醉爆街頭

早前本刊拍得王敏奕搵好姊妹陳瀅及糖妹陪散心，當晚三人到Bosco位於九龍城的蠔吧，在一樓的VIP房內擦蠔食牛扒狂飲紅酒白酒，至凌晨一時許，踢住拖鞋披頭散髮的王敏奕在姊妹兩邊扶實下離開。現場所見，王敏奕腳步浮浮企唔穩，手袋都要姊妹幫手拎住，不時自言自語，手機跌埋落地都冇意識執。

Bosco鬼祟閃人

就在三人在蠔吧門口商討去處期間，Bosco突然以光速跑落樓，跳上早已在門口等候的保母車，王敏奕見Bosco上車後，不時望向其方向，最終要陳瀅糖妹拉走佢。眼見糖妹及陳瀅在街頭照顧飲醉的王敏奕，Bosco竟然扮唔識扮路過，連一句問候都冇，咁唔正常有啲嘢喎！

當晚王敏奕的心情明顯非常差，醉哭街頭不特止，仲好唔想返屋企，好不容易才拉到佢去陳瀅座駕停泊的錶位，都要擾攘一大輪先成功上車。糖妹正想關門離開之時，王敏奕失控怒吼：「唔好打畀佢！唔好搵佢呀！」王敏奕似乎為感情事賣醉，好姊妹陳瀅與糖妹為睇實佢，所以非常清醒。

返回柴灣娘家

王敏奕自小與家人住在柴灣公屋，與曾國祥拍拖後一直同居，不過最近王敏奕離奇回歸公屋，未有返回與曾國祥的同居愛巢。本刊記者連日來都見王敏奕在柴灣公屋出入，幫手湊三年級的細佬及幫母親去超市入貨。話說王敏奕身為家中長女，14歲就開始搵錢幫補家計，照顧同母異父的細佬。近年佢搵錢多了，家人生活有所改善，今年農曆年她請母親及8歲的細佬去日本旅行，係圈中出名的考順女。

在商場搭扶手電梯時，王敏奕輕輕力摵細佬面珠，可見姊弟情深。

王敏奕：同Bosco合作好開心！

其後王敏奕在寓所樓下接受本刊訪問，佢表示在《飛虎極戰》同Bosco合作得好開心，另外又否認與男友曾國祥感情生變，稱兩人「OK呀，好好呀！冇問題。」不過婚事卻是遙遙無期。提到未來老爺志偉哥，王敏奕表示對方係自己好尊重的前輩，對自己好好。其實「志偉新抱」呢啲虛名嚟啫，25歲王敏奕有大把青春，條件咁好可以慢慢揀喎！