好多人都话娱乐圈系一个大染缸，缘来缘去，好难情定终身。

不过，娱乐圈入面依然有好多痴心情长剑，同另一半低调咁爱情长跑之后，终于俾对方一个名份，仲同大家分享喜讯。

最近，就有音乐才子林奕匡求婚成功，同拍拖九年嘅女朋友订下婚约。

林奕匡

入行短短几年已经成绩唔错嘅林奕匡原来有个拍拖九年嘅女朋友。

佢同女朋友李霭玑喺加拿大因为一起参加DJ训练班而结缘，当时林奕匡被女朋友嘅口才吸引，仲好欣赏女朋友嘅性格，之后慢慢成为恋人。

虽然拍拖期间感情都亮起过红灯，但二人都一起捱过，近日林奕匡仲喺澳门成功求婚。

事缘佢哋拍拖初期，有次相约去澳门玩，当时林奕匡喺大三巴一时兴起抱起女朋友，跑楼梯到顶。

虽然当时林奕匡跑得好辛苦，但女朋友就形容呢件事系最开心嘅事。

林奕匡一直都记住女朋友嘅说话，于是前几日带女朋友旧地重游。

佢仲秘密准备戒指同埋鲜花，万事俱备之后，佢再次抱起女朋友跑上大三巴，然后跪地求婚成功。

二人打算返去加拿大举办婚礼，祝福呢对新人一直幸福落去。

周柏豪

周柏豪虽然系好多少女心目中嘅男神，但佢对感情事一向保密，绝对系众人眼中嘅「钻石王老五」。

但原来周柏豪一直有一个好稳定嘅圈外女朋友，仲已经拍咗拖十年咁耐！

去年年底，周柏豪被影到飞咗去布吉同女朋友结婚，婚礼由60名亲友见证，非常低调。

一对新人喺沙滩行礼，二人交换完婚戒后，周柏豪难掩新婚之喜，即刻揽实老婆甜蜜锡锡，非常幸福！

虽然消息传开之后，唔少「周太」觉得太突然，心都碎埋。

但其实柏豪早喺2014年一个颁奖礼上面开口多谢女朋友一直不离不弃，仲话会跑快啲，希望快啲俾佢一个名份。

不过呢个爱嘅宣言就无乜人记得，所以大家对于周柏豪密婚一事先会咁惊讶。

点都好，恭喜晒！

古巨基

已经同老婆Lorraine结婚2年多嘅古巨基，婚姻生日一直都甜蜜美满。

二人之所以相识系因为Lorraine系基仔嘅助手，二人互相扶持，一起经过好多起起跌跌，最后基仔喺乐坛闯出一片天，获得非常好嘅好成绩。

其实佢哋工作期间已经擦出爱火，不过恋情一直保持低调，属于行内公开嘅秘密。

基仔同Lorraine爱情长跑咗20年，最终二人喺拉斯维加斯拉埋天窗，踏入人生另一个阶段！

当时基仔仲喺社交媒体上深情留言：

「从94年我第一张唱片开始，在我工作上你一直紧守在照顾我嘅岗位。然而此后，你嘅未来，就让我来好好嘅照顾。」

可以同行20年嘅确唔容易，见到佢哋成婚，真系好感动。

少爷占

少爷占少爷占做咗DJ咁耐，份人古灵精怪就系人都知。

一直被外界认为未婚嘅佢不停被人催婚，但佢都推搪话迟啲先。

直到结婚七周年个日，亦都系情人节，少爷占突然出post写爱嘅宣言庆祝结婚纪念日。

朋友同粉丝们到个刻先知原来佢已经秘密结咗婚七年咁耐，当场吓到呆晒！

其实少爷占同老婆Tina系青梅竹马，幼稚园已经相识，影毕业相嘅时候仲企喺同一排，非常有缘。

直到中学重遇之后，少爷占就力追Tina，最后抱得美人归。

结婚一事爆出后，少爷占就话二人由中五已经一起，然后决定喺2006年结婚，不过事件只得双方家人知道。

但觉得女朋友一直被人问起几时结婚唔系咁好，所以决定公开。

数数手指，佢哋已经结婚11年，真系好sweet。

金句王

微信号：jinjuking

睇金句王，爽过去爆房！
每日发布粤港澳第一手开心嘢！
粤语 | 爆笑 | 搞嘢 | 吹水 | 抵死 | 顶瘾

欢迎搭讪 投稿都啱 合作更赞 小编微信: KingKingGuy