樂壇天后容祖兒自從開完史無前例嘅Side Track演唱會《My Secret Live》之後，就幾乎好似收山咁，今年冇新歌出嘅關係，Joey仲揚言話今年唔打算拎獎，預告缺席年尾嘅頒獎禮，「其實我今年冇歌，我一首歌都冇，就算我出席都係純粹支持，對我嚟講，以我條件已經超額完成咗我一生要做嘅嘢，我都隨遇而安去面對工作。」所以近期佢都係做演唱會碟嘅宣傳，同埋拍吓廣告咁，前排仲同好姊妹阿Sa拍旅遊節目，寓工作於娛樂，相當寫意。

前幾日Joey先孖住阿Sa同阿嬌開live。（網上截圖）

上次Joey同阿Sa阿嬌拍廣告時，被大家笑佢Facebook、IG更新得最快，成日都有新嘢睇，佢都笑住默認自己太得閒。尋日Joey又喺IG開Live，今次係同古巨基喺K房唱K，兩個人同樣今年都係冇出新歌，所以一開波點唱，就係佢哋喺11年前合作嘅《加州紅903黃金組合音樂會》中，曾經唱過嘅超長改編Medley《狂串樂基兒》，足足唱成十幾分鐘，入面首首都係經典金曲，好似《怯》、《Monica》、《習慣失戀》、《愛與誠》、《16號愛人》、《歡樂今宵》等等。雖然只係喺K房，但Joey同基仔都冇放軟手腳，震音假音全部出晒嚟，好期待佢哋兩個人之後仲有咩搞作！

Joey唱到超high！（網上截圖）