歌手劉浩龍（師兄）推出最新派台作《阿龍理髮》，由林海峰填詞，唱出都會男失意時剪個靚髮轉換心情。早前他到北角一間懷舊髮型屋拍攝MV，穿起舊式髮型師白色長身外套的他，在MV中替顧客理髮兼剃鬚，各人因此心情變得快樂，更與師兄一起跳扭腰舞。

對於要在MV中施展舞功，師兄笑說：「出道多年後嘅今日，終於初嘗做跳唱歌手嘅感覺。」反而要做髮型師，他就被考起：「MV入面，我只係扮剪髮，但今次唔同，真係要落手落腳幫幾位素人剪頭髮，講真好大壓力。」為加大力度推廣新歌，他所屬的唱片公司安排四位素人矇上雙眼，讓師兄幫他們理髮，並將過程製成短片，分享每根頭髮所背負的不同煩惱。

師兄說：「佢哋全部唔知髮型師係我，後來有個女顧客，要求將長髮剪短，當佢打開眼罩，見到自己嘅短頭髮，忽然眼有淚光，我以為我剪得唔好，原來係佢前一晚同男朋友分手，佢多謝我幫佢剪走好多煩惱，我當時聽到眼濕濕。更加證明到，頭髮真係人嘅煩惱絲，就算你改變唔到身邊事，但你可以選擇轉換髮型、心情，因為做人最緊要開心。」