“大美人”李嘉欣年初突然于社交网自爆入院，严重得入住ICU进行抢救，生死搏斗足足48小时，并扬言“执番条命”、“呢个世界差啲冇咗我”等，好在依家佢回复健康，仲成日靓靓出席饭局，更刚过52岁生日。近日佢重提当时病重情况，指自己今年一月某个半夜，突然心跳得好快，每分钟跳160，好唔舒服，老公许晋亨请医生上屋企睇佢，医生并即刻为佢安排病房，紧急入院。

佢提到当时睡意正浓，老公本身想畀佢瞓多阵先入院，点知当时医生坚持要佢入院，指如果畀佢瞓着，佢好可能唔会再醒。迷迷糊糊嘅李嘉欣，当时仍未知情况危急，仲强撑同家人讲自己冇事，叫佢哋唔使担心。直至入医院办完手续，大家先知事态严重，家姐李嘉明见到佢时，佢对眼已经白蒙蒙一片，好得人惊。上到病房，护士更量唔到李嘉欣血压，肺科医生话佢有严重肺积水，所有内脏包括肝、肾已停止运作，要即刻入深切治疗部。直至抽完肺水，佢先终于唞得番气。之后心脏科教授为我检查，check到佢心脏先天性多咗一条血管，条血管好似短路咁乱跳，所以当时我个心唔系跳紧系震紧，160系心震，因此体内先冇血输送去内脏。

当时10岁嘅仔仔Jayden正喺家中等消息，不断致电妈妈追问情况，但李嘉欣为免佢担心，只好气若柔丝安慰佢话“妈咪冇事，唔使担心”直头佢社交网出post，阿仔睇完好嬲，问佢点解咁大件事都唔话佢知，佢觉得自己已大个仔，唔应该呃佢，令李嘉欣好惊讶仔仔咁成熟。于农历年过后，李嘉欣再接受导管消融手术，喺大腿旁穿一条导管进入心脏，防止再有异常的心律不整。而佢依家都好感恩，个心冇再乱咁跳。事后佣人姐姐都叮嘱我，有唔舒服一定要出声，千祈唔好死顶。