藝人廖碧兒為ViuTV有份飾演的連續劇《瑪嘉烈與大衛系列 綠豆》作宣傳，她表示剛從外地工作回來，過去三年在加拿大及新加坡拍劇，直言很久沒以廣東話拍攝：「今次返嚟可以同保怡（林保怡）繼續合作，好開心，都十年喇。」

時間非常緊湊

廖碧兒表示時間非常緊湊，剛剛才收到劇本，今早才試造型，還未正式開拍，問到劇中與誰有對手戲？她說：「唔可以講太多，身邊有好多人擦過，主要係同保怡。」

認香港同外國拍攝唔同

至於比較喜歡在哪裏工作？廖碧兒表示：「好耐冇返嚟，今次可以見吓屋企人、狗仔，留吓喺香港，可以去唔同地方做嘢好幸福，好掛住香港。去過外國拍嘢，發覺香港真係好唔同。」

【ViuTV開台】周家怡冇同人同居 唔知自己有冇扯鼻鼾

將於下月6號開台嘅免費電視ViuTV，今日晏晝係大角嘴舉行記者會，宣佈新劇《瑪嘉烈與大衛系列 綠豆》將會係11號正式播出，一班劇中演員包括林保怡、周家怡、廖碧兒、潘燦良同湯怡今日就齊齊現身記者會。

劇中飾演同居情侶嘅保怡同家怡受訪時話，成個製作班底同拍攝手法好新鮮，保怡仲話同以前拍劇嘅環境完全唔同:「而且對白唔多，會講番平時情侶會講嘅嘢，加上全部係實景拍，同以前模式好唔同。」

劇集11號就會推出，所以拍攝時間好趕，佢哋話:「會有26集每集半個鐘，一陣做完活動又要即刻返去拍，雖然有啲壓力，但係好好玩。」保怡仲話同家怡好似掛住個學牌嚟拍咁，因為係全新體驗。

問到拍攝期間趣事，家怡話記得同保怡有場瞓覺戲，講佢要扯鼻鼾，不過點都扮唔到果隻鼻鼾聲，要瞓响後面嘅保怡代勞扮聲，但自己就不停偷笑，搞到要係咁NG，問佢現實生活自己會唔會扯鼻鼾？佢笑話:「我點知，我都無同人同居。」

至於同劇嘅廖碧兒就話自己啱啱係外地返港，早排分別去咗新加坡同加拿大拍戲，所以已經好耐無試過用廣東話拍劇，佢話:「我要9號先開工，但已經收咗劇本，呢兩日就要試造型同影宣傳相。」