藝人李彩華（Rain），去年初與拍拖三年的「新五虎」成員何遠恒分手後，感情至今未有着落。事業得意但愛情Dry爆，不過唔愁寂寞，不時做孝順女陪父母周遊列國，又相約朋友出海玩樂晒Fit爆身材！

黃嘉樂加入戰團

近日放假返港，Rain相約攝影師好友Samantha於大坑歎雞煲，兩人有傾有講，醫肚後兩人仍意猶未盡，於是再到附近餐廳靜靜地飲嘢繼續Girls Talk，未幾見戴住Cap帽的黃嘉樂前來會合。席上見兩女齊齊研究手機上的內容，Rain還托住下巴專心聆聽，甚至講到嘴嘟嘟，表情多多，而同場的黃嘉樂只好翹埋雙手安靜地坐在旁邊聽。

期間發現有記者拍照，他們友善地揮手打招呼，素顏上陣的Rain即急急塗上唇膏補妝扮靚。眾人至凌晨12時才捨得埋單離開，其後嘉樂拖女友往停車場取車，而「電燈膽」Rain則獨自駕車返歸。