劲赞哥哥有情有义 黄百鸣：呢个人真冇话可说！
苹果娱乐 / 2018年01月29日 / 采访：陈月媚、怀钰

讲到最欣赏嘅人黄百鸣就好爽快答咗系张国荣（哥哥）。

佢仲大赞哥哥系一个有情有义嘅人。

黄百鸣喺影坛超过30年，曾经与无数演员同导演合作过，佢接受本报连载式专访时，梗系要问下佢有边啲演员系佢好欣赏同失望啦！佢话：“失望嗰啲我唔讲喇！亦都太多，无谓讲喇！”不过最欣赏嘅人佢就好爽快答咗系张国荣（哥哥），不过可惜对方已经唔喺度！

早于新艺城年代黄百鸣已经看好张国荣，所以主动搵哥哥签咗3年电影合约，佢话：“我最欣赏、最尊重，我成日都讲一个人，嗰个系张国荣，其实佢当时喺新艺城，拍第一套片嘅时候呢，即我哋唔识佢㗎，嗰套叫《圣诞快乐》，嗰套戏嘅主角叫陈百强，佢喺套戏只系做配角嘅啫！但点解拍完套戏我哋会签佢呢？就系觉得......咦，佢真系有潜质喎！佢真系会好好，我哋睇人真系有啲眼光，所以即刻捉住张国荣同佢签约咁一签就3年，我就同佢嘅经理人陈淑芬，一杯咖啡就搞掂，好简单，3年到啰喎，又饮杯咖啡，又签3年，甚至乎后来唱片都签埋畀我哋啦！”

黄百鸣点解咁喜欢哥哥，系因佢觉得演员之中，哥哥算系一个有情有义嘅人，第一套《家有囍事》成功之后，相隔几年再拍《97家有囍事》嘅时候，因为周星驰开了天价片酬，黄百鸣唯有喺其他方面悭啲晒，所以第2集唔打算请哥哥演，搵咗当时片酬平啲嘅吴镇宇顶替。

点知到开镜嗰日，哥哥打电话畀佢，唔通哥哥要打电话闹鬼佢？黄百鸣话：“哥哥打嚟搞到我唔多好意思，佢话：‘百鸣，你拍《家有囍事》呀？’我话系呀系呀！佢就讲：‘我嚟客串，我要拍个ending，我嚟吖！’佢二话不说走嚟客串，系无收过我一毫子，量度几大，好多人会好唔开心，问点解唔搵我，但哥哥第一句话你拍《家有囍事》点解你唔搵我，佢冇讲，佢只系话你拍《家有囍事》恭喜你！嚟帮你客串！哗，我当时真系好内疚！我点解唔搵佢呢！嗰阵时已经拍紧，剪彩嗰幕，呢个人真冇话可说！（做出手势good）”

黄百鸣又赞哥哥对长辈系好尊重，每年嘅大年初一，佢必收到哥哥打来拜年嘅电话：“每一年嘅大年初一，我必收到佢打嚟电话同我讲恭喜发财！亦都可以咁讲，由新艺城到后嚟我嘅东方电影，佢净系签畀我㗎！因为我哋个合约就好松动嘅！除咗拍我哋戏呢！容许佢拍外面嘅戏嘅，只要打招呼就得㗎喇！所以佢一签畀我东方嘅时候呢，我都未拍《家有囍事》，佢同我讲，有套戏搵佢叫《霸王别姬》，佢好想拍，我话你去拍，即系话我支持你去拍，你拍完先嚟拍我，所以我哋系好有默契架！咁所以佢，哥哥签嘅合约，由新艺城到东方，只系我哋两间架！都系同我有关㗎！”

直至到97之后，因为个市道不境，盗版各方面充斥，黄百鸣就话当时冇再同哥哥签约，而哥哥亦回复自由身拍戏，而后期黄百鸣就少同哥哥联络，去到哥哥出事嘅前几年少联络咗。

拍《家有囍事》系“被迫”? 星爷原本角色系……

苹果娱乐 / 2018年01月30日 / 采访：陈月媚、怀钰

《家有囍事》一众演员。

 
大家有冇发现，自92年贺岁档上映过周星驰、张国荣同张曼玉主演嘅《家有囍事》后，之后每逢过年，一打开电视机，总会有电视台回放呢套戏，而观众好似睇极都唔厌，只要见到电视播紧就一定唔会转台！嗱！呢部喜剧经典都系黄百鸣一手炮制出嚟！佢日前接受本报连载式专访，爆咗唔少开拍呢部戏时，好多鲜为人知嘅趣事出嚟！

佢话部戏找周星驰演系迫于无奈，1992年拍摄《家有囍事》找周星驰是“被迫”，佢话：“我最先呢个角色三兄弟，林子祥做大佬、张国荣同我、我就做个cam cam地，拍吴君如做个tom boy㗎嘛，张国荣做周星驰嘅角色，就拍张曼玉，点知林子祥间屋……就喺，你记不记得有一年（地震定火烛）火烛，返唔到嚟，喺美国返唔到嚟咁点呀！即刻换人啰！咁我第一时间就搵周润发啦！点知周润发就话我又做紧又系贺岁喎！嗰个叫做《我爱扭纹柴》，咁即系同你对打台喎！咁即系又系唔得啦！唔得，咁死喇，左搵右搵，咦！咁嗰阵时周星驰就啱啱冒升紧，咁就搵佢倾啦！”

当年找星仔拍呢部戏，星仔开咗一个天价，但黄百鸣一样照俾佢：“我赶住要开拍吖嘛！咁所以呢，我明知佢收紧人哋200万，佢要攞我800万，我都畀佢，条友仔梗系（舌累）饭应啦。当然佢有个要求啦！睇完个剧本，佢话可唔可以畀我同张曼玉做对手呀！我话唔得，我同佢讲：‘钱你就攞足喇！嗰个对手系张国荣，已经定好咗㗎喇，我话有两个角色畀你拣，一系你就做个花心老公，一系就做个cam cam地，佢话打死我都唔做个cam cam地㗎喇，宁愿做个花心老公。”

“1990年哥哥退出返咗去加拿大，我就话一定要搵哥哥复出拍《家有囍事》，我就畀咗个任务高志森，咁哥哥真系太后生退休嘛！咁我就叫咗高志森过去搵哥哥，写好咗个剧本㗎喇！我就叫佢做个花花公子配呀张曼玉，叫高志森过去畀个剧本佢睇，想佢返嚟拍呢套戏，哥哥应承咗！”

“点知佢一落飞机，就捉住我，话一定要同我饮餐茶，仲去我嘅乾坤阁，一坐低就话，嗱，我睇完个剧本，你唔好同我争，我要做cam cam地，个对手系毛舜筠因为我哋两个做系一定赢嘅，咁得啦，我唔会同你争，我畀你啦！咁我惟有做个花心老公啦！跟住就拨个轮畀周星驰，同佢讲：‘喂，靓仔你恨到喇！依家真系你同张曼玉做对手，咁我就同吴君如，点知又轮到吴君如抗议喇，喂，我做个tom boy，我已经准备好晒，我会做得好好㗎喎！你依家要我做个贤妻良母，我点做呀！即做个白燕我点做呀！你咪做个搞笑嘅白燕啰！所以嗰执汗毛系我叫佢加上去㗎！我话你整执汗毛喺度啦！”