昨日38岁生日嘅蔡卓妍（阿Sa），早两日就被拍得同男友石恒聪（Anthony）拖手出巡，不过原来过12点呢个重要时刻，阿Sa就选择同好姊妹锺欣潼（阿娇）一齐过！阿娇于社交网上载合照，并发文庆生：“祝我sasa开心幸福快乐地过每一天！”

照片中阿Sa一身家居服，以紫色套装上阵，阿娇就一身黑色Look有型又够Chok，佢仲靠喺阿Sa膊头揽到实，两姊妹亲密无间。

大合照中就见容祖儿同关智斌、曾乐彤都有出现，但有眼利网友就发现原来祖儿系P上去，因为工作关系，佢被迫要缺席，见大家都咁有心畀佢“现身”，睇嚟真系友情比天高呀！虽然佢唔在场，但佢都冇忘记阿Sa生日，仲晒出多张旧照隔空祝贺寿星女：“一切尽在不言中，只系冇得吹你枝蜡烛感到有点可惜！”原来今次个Party喺屋企搞，周丽淇就上载多张同阿Sa嘅合照，留言：“已经唔知第几年同你一齐庆祝生日了，但今年就第一次在家中举行，既温馨又开心！”