相信各位姊妹都想喺節目搵到答案。（電視截圖）

年齡從來是女人的煩惱，早年周秀娜與鄭欣宜的電影《29+1》引起不少共鳴，令不少步入關口的女性朋友睇到流淚。TVB亦捉正近年「中女」話題，由一向有性格的視后田蕊妮（阿田）孭飛主持新節目《女人四十》，昨晚首播ROUND UP整個節目，首先談到她與一眾朋友對「40」這個數字的認同。

五位盛女摸杯底玩LADY’S TALK。（電視截圖）

阿田落足力谷收視，早已預告碌盡人情卡，請盡圈中「黃金盛女」登場，首集亮相的好友包括蔣怡（41）、杜如風（43）、車婉婉（43）以及谷祖琳（41），節目播出後不少人讚婉婉保養得好，杜如風亦不似43，但可能忽略了少上電視的蔣怡（CoCo）這位名模，其實她拍攝時剛誕下兒子三個月，同時正值哺乳期，但已極速恢復弗爆身材。

入得廚房出得廳堂，應該係選擇而唔係責任。（Instagram）

藍帶廚師炮製家常飯菜

178cm的CoCo身材高挑，以模特兒出道至今已20年，已是一子一女之母，可見她對保養有一套，近年加入TVB做親子KOL。CoCo充滿時尚氣息亦入得廚房，本身對中菜已有一手的她，早年與拍拖十三年的設計師老公翁狄森拉埋天窗，至誕下囡囡後，隻身到倫敦藍帶廚藝學院進修廚藝九個月，蔣怡直言回港後改變最大的，便是個人社交網站充斥了「愛心便當」。

記者嘗試聯絡CoCo為大家八卦保養秘訣不果，她後來回覆指正忙於為家中做大廚宴客，相當熱衷於做「煮飯婆」！對於上節目被標籤做盛女，CoCo接受《香港01》訪問時表示，年齡從來不是秘密：「真係無擔心過40歲喎，記得生日去旅行慶祝，在Instagram甫了一張比堅尼相，我覺得最緊要係欣賞自己，反而朋友反應好大。今次上節目都係同其他姊妹切磋一下，對於佢哋話題唔係好大共鳴，可能我發展遲過人，內心亦低能少少！」

提到最強媽咪的保養秘訣，CoCo忙於照顧初生兒子，更要哺乳及紮肚，生產後體重直跌，但沒有特別的保養秘方：「最重要係搵到專注嘅嗜好，好開心當年決定去藍帶學廚，然後一對子女先後出世，呢幾年我都無時間去諗40歲嘅轉變，佢哋令我重生，只要一直保持熱情，人生唔會有下坡路。」CoCo補充說：「但40歲之後我識驚喇，但係之後嘅事，我好享受依家嘅生活。」