འུ་གཉིས་ལ་སྐད་ཆའི་གྲིམ་ལྷོད་ལྟར

བཤད་ཆོག་པའི་ཁ་བརྡ་ཐུང་ངུ་ཞིག་ཡོད་པའི་དབང་དུ་བཏང་ན

ངས་ཐོག་མར་ཁྱོད་རང་ནམ་ཞིག་ལ

འདི་ལྟར་ཁེར་ཧྲེང་ངང་རྒས་པའི་རྒྱུ་མཚན་དེ

ཡང་སྙིང་གང་ལ་ཐུག་ཡོད་པ་ཤེས་འདོད་ཆེ་མོད

མཐའ་མཇུག་གི་རེ་ཞུ་ཞེས་པའི་གླུ་དབྱངས་དེའི་དབང་གིས

ངས་འཇིག་རྟེན་འདིར་རང་གི་འཚོ་བ་ཁོ་ནར་བཟུང་བའི་རྣམ་འགྱུར་དེ

ཁ་རོག་གེར་ཁྱོད་ལ་བཤད་འདོད་སྐྱེས་ཡོད

གལ་ཏེ་ཁྱོད་རང་བརྩེ་དུང་གི་དབང་དུ་སོང་བའི་མཐའ་མར

འཇིག་རྟེན་འདིའི་མུན་ནག་གི་སྒོ་གླེགས་ཤིག་བརྡུང་རྒྱུར་ཤིན་ཏུ་སྐྲག་ན

རང་གི་སེམས་ཁོང་གི་ཕྱིར་དྲན་དེའི་ཕྱེད་ཀ་ཁེར་རྐྱང་ལ་བྱིན་ཆོག་པ་དང་

ཕྱེད་ཀ་གཞན་པ་དེ་ཡང་སྨྲ་བ་མེད་པའི་མཚན་མོ་དེའི་དབྱིངས་སུ་གཏོར་ཆོག་པ

གཞི་ནས་ཤེས་དགོས་པ་ཞིག་རེད་ཅེས་ངས་གཞན་ལ་བཤད་མྱོང་ལ

སྐྱིད་སྡུག་གི་ཆར་ཟིམ་སེམས་ལ་བབས་པའི་དུས་སྐབས་ཤིག་ལ

ཁྱེད་ནི་ང་དང་འདྲ་བར    ཡིད་ཀྱི་མུན་པར་བསྐྲགས་པ་ལྟ་བུའི

སྐྱོ་གདུང་གི་ཟམ་ཁར་འགྲེངས་བའི་མི་ཞིག་ཡིན་པ་ཤེས་ཡོད

མཇུག་མཐའི་རེ་ཞུ་བ་ཞེས་པའི་སྐྱོ་གདུང་གི་མུ་འབྲེལ་དེས

མི་ཚོགས་ཀྱི་རླབས་རྒྱུན་གྱིས་དེད་པའི

རྒྱུས་མེད་དུ་འགྱུར་གྱིན་པའི་སེམས་ཀྱི་ཁྱེར་ཕྱོགས་མང་བོ

གང་ཞིག་ལ་ཁྱེར་ཚར་བ་དང་འདྲ་བོ་འདུག

ངའི་སེམས་ནས་དུས་རྒྱུན་དུ

སྡུག་བཟོད་མེད་པའི་གཟུགས་ཅན་གྱི་ཐ་སྙད་མང་བོ་ཞིག་གིས་

ཡོངས་སུ་མཚོན་ཐུབ་པའི་བང་རིམ་རེ་རེ་དང་

ཡི་གར་འོང་བའི་འཆི་ཁའི་ངལ་གསོ་རེ་རེ་ནི

མུན་ནག་གི་སྐྱེ་བ་བཞེས་པའི་འཚོ་བ་འདིའི་མགོ་རྔ་མང་བོར་

ཅི་འདྲའི་ཡ་མ་བརླ་མ་ཞིག་ལྟར་སྦྲེལ་འདུག་པ་དེས

མཚམས་རེར  ང་རང་ཞག་གང་བོར་སེམས་མི་སྐྱིད་པ་ཁོ་ནར་བཏང་མྱོང

འུ་གཉིས་ཀྱི་འབྲེལ་བ་ནི་ཧ་ཅང་སླ་མོ་ཞིག་ཡིན་ན་རེད་མོད

ཞེ་བསམ་པས་འདང་རྒྱབ་ཀྱིན་རྒྱབ་ཀྱིན་ཧ་ཅང་དཀའ་མོ་ཞིག་ཀྱང་རེད་འདོད་གི

ཁྱོད་ཀྱི་བརྩེ་གཞས་སྣ་ཚོགས་མཚོན་པའི་གླུ་དེ་ཚོའི་ནང་དུ

ཆོད་སེམས་ཁོ་ནས་མུན་ནག་གི་སྒྲ་ཡོངས་སུ་དཀྲོགས་ཐུབ་པ་དང

བརྩེ་དུང་ཁོ་ནས་གྱེས་བྲལ་གྱི་སྐྱོ་ཡུས་སྣ་ཚོགས་ནང་སེམས་ལ་བརྐོས་པ་དེས

འུ་གཉིས་ཐག་རིང་ཞིག་ནས་ཐག་ཉེ་ཞིག་ལ་སྦྲེལ་བ་དང་འདྲ་བོ་འདུག

ངས་རང་ཉིད་ཡང་སྙིང་ཉེ་བའི་ཡུལ་ལྗོངས་འདིའི་མཚན་མོ་མང་བོ

སྐྱོ་སྡུག་གི་བྱུང་རིམ་སྣ་ཚོགས་མཚོན་པའི་སྙན་ངག་བྲི་མཁན་ཞིག་ཡིན་ན་བསམ་ཡོད

གཙོ་བོ་སྡུག་གི་ཐོག་ལ་སྡུག་མི་ཐེག་པའི་སྐྱོ་སྣང་དེ་གཙོར་བཟུང་ནས

རང་གི་མིག་མདུན་གྱི་དར་རྒུད་དེ་དག་གི་མཐར་ཐུག་ལ

སེམས་ཞིབ་མོས་ཁ་བརྡ་བྱེད་མཁན་ཞིག་ཡིན་ན་བསམ་ཡོད

ཡིན་ནའང   འུ་གཉིས་ཀྱིས་ནམ་ཡང

འཆི་སླ་བའི་མཚན་མོ་ཞིག་གི་ཁེར་ཧྲེང་བཤད་ནས་བསྡད་མྱོང་ངེས

མི་ཚོགས་འདིའི་ཁ་འཁོར་ཕྱོགས་ཀྱི་རླུང་བུ་དེ་འདི་ལྟར

ཡང་མོར་རྒས་འགྲོ་བའི་ངང་ཚུལ་ལ་བལྟས་ནས་བསྡད་མྱོང་ངེས

རང་ཉིད་ནི་ནམ་ཡང་ཡུལ་གྱར་བ་ཞིག་གི་བརྩེ་དུང་གི་ལས་འཕྲོར་བྲིས་པའི

རི་མོ་ཞིག་ལྟར་རྒས་ཀྱིན་པའི་དུས་ཚོད་ལ་བལྟས་ནས་བསྡད་མྱོང་ངེས

༢༠༡༨ལོའི་ཟླ༧པར།