早前求婚成功嘅安志杰，同未婚妻Jessica C.甜蜜現身機場。

安志杰同Jessica C.當眾四度親吻，羨煞旁人。


早前，安志杰喺馬爾代夫向已經懷孕三個幾月嘅女友Jessica C.求婚成功，計劃明年結婚。噚日，佢哋由馬爾代夫返港，兩人戴住黑超現身機場，當眾四度親吻，非常甜蜜。Jessica C.大晒近兩卡嘅求婚鑽戒，表示對求婚一事感到驚喜，佢話：「當時喺沙灘睇寄居蟹，睇睇下見到入面有戒指，之後佢（安志杰）捉住我隻手，問我可唔可以嫁畀佢，嗰一刻我完全講唔到嘢。」

安志杰透露花咗一個多月籌備求婚，問到係咪因為有咗BB先求婚？佢話：「之前活動上唔講係想畀驚喜佢，希望求婚後再講呢個消息。」佢仲話Jessica C.而家懷孕將近五個月，但暫時未知性別。至於婚禮嘅安排，安志杰話：「暫時未知，因為要再計劃。不過到時我會放低手頭嘅工作，陪Jessica C.返美國待產，到BB出世後再一齊返香港，到時再喺香港補辦婚禮。」