藝人張達倫接受電台訪問傳宣劇集《平安谷之詭谷傳說》，對於劇集得到非常好的回響，張達倫表示非常開心，笑言終於撇甩「嚴謹」：「依家啲人會叫我做阮先生，同蘇玉華（阿蘇）都好鍾意劇入面嘅一啲場口，會互相Send訊息，嚟緊期待一場係同阿蘇私奔但畀人捉番去嘅戲份。（之後會唔會再想同佢多啲合作？）梗係想，次次同佢講，佢都會話『我都未死』。」

私下捧蘇玉華場

張達倫表示私下經常會捧蘇玉華演出的舞台劇場，問到可會有機會一同演出？他指自己都恨演，但怕麻煩到對方：「舞台劇個感覺唔同，現場感會好玩啲，入行之前都做過一個細舞台劇，十幾年冇做，唔知再做又會係點，睇吓今年有冇機會。」

囝囝出濕疹

談及剛過百日宴的囝囝張凱碩，張達倫即時慈父樣甜笑，更向記者大晒BB相：「好得意好開心，但係最近佢出濕疹，成身都係，塊面都有，好心痛，咩方法都試過，佢試過好番，但過幾日又咁，依家搵緊係奶嘅問題定係其他問題。（會唔會關遺傳？）我以前細個都有，都驚係，希望過幾個月會好啲，都睇過好多次醫生。」他又指現時經常與車婉婉開工，笑言對方送贈了成車的BB衫：「佢都有畀啲Cream我試吓搽，咩都試，有時佢瞓唔到就我哋都瞓唔到，最辛苦係老婆。」

農曆新年將至，問到可會帶囝囝去逗利是？張達倫表示會：「新年有3日假，可以同佢去玩，之後就要繼續開工到3月，講到新戲，戲入面個名同囝囝一樣都有嗰『碩』字，真係好有緣！」