「三金影帝」梁朝偉出咗名圈中「社恐」代表人物，面對唔熟悉嘅人就會自然流露驚青一面，早前佢現身影壇年度盛事電影導演會周年晚宴，成晚亦頻頻被現場唔同藝人求合照集郵，一晚要面對咁多人，佢嘅「社恐」表現真係遮都遮唔住，當中就以組合P1X3L 3位成員同佢嘅合照最搶眼。

可能係因為一次過要對住3位高大後輩，雖然成員歐鎮灝大嗌：「我無憾了」但合照中，P1X3L三人表現淡定，吳啟洋更手持酒杯Chok晒樣，其餘兩人就笑容滿面，相反梁朝偉怕醜抿嘴而笑，縮起肩膊，又緊握雙手致青筋盡現，表現極不自然。上載合照後，網民都笑梁朝偉反而似係三人fans，狂讚佢對「緊張的小手」夠Cute，似足畀人挾持住咁。而吳啟洋就留言戲稱：「與人保持一定的距離……我都好緊張。」

梁朝偉（右）呢個抿嘴、一對手仔，睇得出真係好緊張。

P1X3L今次真係夠晒威。