藝人何傲兒(Lily)與周子揚的一段情終於劃上句號，不過兩人互爆是非，周子揚更指被何家每月苛索廿萬生活費。今日Lily同黃智雯今日出席商場活動，佢表示希望新一年可以搵到真命天子，希望是非遠離自己，又話自己其實都係個普通女仔，男朋友只要真誠、善良同專一就得。

Lily表示上星期已經向周子揚發出律師信，話自己本來都唔想走到呢一步，因為覺得唔係事實唔需要澄清。但對方講得愈來愈過份，Lily認為自己有責任去捍衛家人，最唔開心就係影響到家人。

另外Lily透露自己去年九月正式與周子揚分手，再三強調自己係天主教徒，好多嘢都會守住，似係暗示自己還是處女之身。被問到係咪即係守身如玉？Lily 就話︰「守住好多教規。」之後亦表示︰「我份人好專一，分開的原因周生最清楚。我爸爸教我做人要有口德，呢個係我自己修為，細節唔多講，已經交由律師處 理。」