出名系爱妻号嘅张继聪喺 情人节，知道太太谢安琪话唔想要物质嘅礼物，于是突然喺街头公开唱咗首《每天爱你多一些》送畀老婆，唔止Kay冧猪猪，其他人见到佢哋咁Sweet都好令人羡慕啊！其实认真数下，娱乐圈入面都有啲相爱多年嘅模范夫妇，大家睇吓知道以下几多对夫妇嘅甜蜜故事？

盘点9对娱圈模范夫妇！

1. 张继聪&谢安琪：结婚12年

张继聪同谢安琪（Kay）一直系娱乐圈中嘅模范夫妇，早前二人踏入结婚12周年，二人选择食餐饭，简简单单地庆祝。张继聪上载一张由美国作家及新闻工作者Mignon McLaughlin 写嘅金句“A successful marriage requires falling in love many times ,always with the same person.（一段成功嘅婚姻要不断与同一个人堕入爱河”送俾老婆，真系超级浪漫！

除咗金句，张继聪亦送上2只刻有名嘅杯俾老婆，，物轻情意重，简简单单嘅礼物却有意义！

而日前情人节，呢位“爱妻号”又为太太送上一个最难忘又浪漫嘅礼物，之唔系喺尖嘴街头唱情歌啰，真系sweet到晕！张继聪昨晚在Instagram上写道：“老婆话唔要啲物质礼物，但系要难忘嘅冧猪嘅几十年后都记得嘅，于是我带佢去海旁，问班年轻人借咗啲架生……”原来佢问喺海旁嘅年轻人借咗支结他，即兴自弹自唱张学友首《每天爱你多一些》冧老婆，片中所见现场有近百人围观，见证呢个浪漫时刻！

当镜头影到Kay时，佢笑得好灿烂好冧成副冧样出晒嚟，相信呢份礼物最永恒，也令呢位幸福人妻一世难忘！

张继聪仲话要多谢班借乐器畀佢嘅年轻人，更向Kay表白话要“每天爱你多一些”，两公婆恩爱到晕。

原来突击献唱前仲有段小插曲，张继聪话喺海旁遇上周国贤夫妇，而周国贤除咗帮张继聪拍片，都有份拎起结他献唱佢首《目黑》！

张继聪冧完今世情人，再发咗张同前世情人嘅相，佢上载咗张咀嘴囡囡温馨照祝大家情人节快乐，仲搞笑话张相系“激嬲老婆系列”！

张继聪同老婆谢安琪于2005年同期出道，但系Kay好快喺音乐事业上有所成就，佢唱到街知巷闻更横扫多个大奖，好出名。反之，张继聪仲系个寂寂无闻嘅艺人。佢哋喺2007年结婚，俾网民以“谢生谢太”去讽刺佢哋事业上女尊男卑嘅情况。

张继聪一家Chok住影相 仔女抢晒镜！

11岁嘅张瞻已经学识打扮，仲高到去妈妈嘅膊头！两兄妹仲学识摆甫士，哥哥识Chok样，而妹妹张靖两只手笃住脸仔扮可爱，张继聪同谢安琪都冇佢哋咁抢镜！阿聪仲留言话“#哥哥晓摆甫#妹妹识插袋”。

近年，张继聪凭住出色嘅演技参演唔少电视剧同电影，加埋佢搞笑嘅形象，令到佢名气节节上升，更曾获“TVB周刊-最强人气广告红人”奖！

2010年嘅时候，因为压力太大，同太太一齐患上抑郁症，但而家已经成功战胜病魔，令两人感情更深厚。

2. 郭伟亮&叶佩雯：拍拖18年、结婚7年

郭伟亮（Eric Kwok）同叶佩雯（Grace）早前分别上传庆祝周年纪念嘅照片，唔少圈中人同网友都留言祝贺！郭伟亮就留言讲话“18th Anniversary, still going strong! (18周年，仍然变得更加浓烈)”，老婆叶佩雯就话“在一起便已足够”，好浪漫啊！

其实当年呢一对嘅求婚结婚故事亦系轰动一时，Eric Kwok 喺自己乐队Swing嘅最后一次演唱会，同女友叶佩雯合唱后，喺近万位乐迷前单膝下跪，送上88支玫瑰霸气求婚。

当时叶佩雯已经喊到泪人，点知Eric Kwok更一早安排律师喺度签纸注册，以及邀请谢霆锋、陈奕迅、黄伟文、何超仪等一众兄弟好友见证，结束两人11年嘅爱情长跑，成为圈中嘅模范夫妻。

3. 单立文&胡蓓蔚：结婚11年

单立文喺娱圈中人称“豹哥”，因此胡蓓蔚亦被称为“豹嫂”！拍拖、结婚加埋超过廿年，豹哥曾经话过呢段感情入面未有过低潮！因为佢话自己其实冇乜朋友，最好嘅朋友就系豹嫂，朋友系佢、老婆又系佢！

豹哥话：“我觉得如果要畀心机keep就唔系婚姻，婚姻其实即系lifetime partner，你对佢好，真系衷心对佢好，每分每秒都为佢著想，每个moment都想佢笑、想佢开心，先至系真正嘅结合，都系出自真心，唔好玩玩吓、或者有其他外来嘅因素而影响到你嘅谂法。 ”

当年结婚，兄弟姊妹团阵容强大，容祖儿、蔡卓妍、张敬轩、陈奕迅等做兄弟，称单立文做老窦的胡定欣当年陪好姊妹出嫁，friend足咁多年。

老婆系“胡说八道会”成员，豹哥亦跟“胡说八道会”胡杏儿、胡定欣、黄智雯、李施嬅及姚子羚相处融洽。

4. 郭晋安&欧倩怡：结婚13年

入行33年、攞过三届视帝嘅郭晋安，06年迎娶拍拖7年、细佢15岁嘅欧倩怡，婚后诞下一子一女，讲到婚姻相处之道，郭晋安话最紧要系沟通：“每个礼拜都要抽一啲时间大家去倾偈，去番拍拖时去过嘅地方！”

大家会觉得郭晋安同欧倩怡喺娱乐圈系一对模范夫妻，好似好稳定，有仔有女，好幸福家庭。但郭晋安曾经剖白过，其实呢个系外壳，里面其实真系引申到好多问题。

而呢啲夫妻之间嘅问题系需要沟通，于是郭晋安开始觉得要每个礼拜要抽一啲时间，大家去倾偈，去番拍拖时曾经去过嘅地方，真系好甜蜜啊！

5. 张家辉&关咏荷：结婚16年

佢哋嘅感情路其实并非一直都一帆风顺！张家辉老婆关咏荷，曾是电视台台柱后来转到无线又成为当家花旦，是当时出名的女星。然而这时的张家辉只是一名普通的亚视演员，他们两人的恋情因为两者名气差距太大，引起粉丝和旁人的讨论，有人更叫关咏荷“玩玩就算啦，别影响事业。”。

后尾张家辉忍唔住舆论嘅压力同关咏荷分开，出走南非8个月。因为要探病危嘅姐姐而返港，原来关咏荷一直都会抽空照顾自己嘅姐姐，呢点令佢好感动，默面决定要发奋向上成为衬得上佢男人。最后于2003年结婚，一齐步入人生嘅另一个阶段。

最后，张家辉凭住自己嘅努力不负“她”望，以《证人》中嘅出色演技，横扫七项影帝，获封“七料影帝”！

关咏荷更加告别咗本来幕前嘅工作，退居到幕后撑张家辉。

6.张智霖&袁咏仪：结婚18年

张智霖同袁咏仪早于1993年摄影电影《边城浪子》而识，二人当时对对方已有好感。

其实早喺佢哋识之前，张智霖经常喺电视台闲逛，希望自制一个“与香港小姐嘅偶遇”嘅机会，最后佢都成功喺2001年将靓靓呢位香港小姐冠军娶返屋企！

2015年，张智霖同袁咏仪一齐北上！参加《一直有你》，节目组仲为佢哋补拍婚纱相。

7.刘青云&郭蔼明：结婚二十年

刘青云疼惜老婆郭蔼明系众所皆知。佢哋喺1992年因摄影《大时代》而识，但一开始刘青云并冇吼郭蔼明，而系各自专心工作，直到后嚟刘青云睇到郭蔼明主持嘅节目先谂起对方，并致电畀佢就噉行埋一齐拍拖6年，并于1998年共偕连理。

呢对黑白配一凹一凸，系圈中公认嘅恩爱夫妇No.1，爱妻号刘青云早年发表“太空船论”冧妻之余亦冧尽天下女人，绝对唔系得个讲字，一直以行动证明有几爱郭蔼明。刘青云早前更趁住6月17日是二人结婚20周年纪念，大手笔买过百万波子赠郭蔼明。

由五光十色嘅幕前生活转战到大汗叠细汗嘅厨房，持家有道嘅郭蔼明唔止入得厨房，仲系出得厅堂嘅港姐冠军老婆！

8.欧阳震华&傅洁娴：结婚22年

欧阳震华（Bobby）经历过两段婚姻，而家已经同现任老婆、一代赌王傅老榕嘅孙女傅洁娴结婚超过廿年，好恩爱！

2013年，Bobby患上急性肺炎，须送入深切治疗部，情况一度严重，好彩大步槛过！Bobby出院时更激动噉咀咗老婆，场面感人！

9.周润发、陈荟莲 结婚32年

周润发(发哥)早前为电影《无双》做宣传，上月佢同发嫂(陈荟莲)更夫妻档接受咗《鲁豫有约》节目专访，亲身带领摄制队进行“发哥贴地日常一日游”九龙城行街市、搭港铁、selfie、行山等。夫妻二人更首度开腔大谈二人相识相爱嘅经过，发嫂大爆：“佢（发哥）追咗两年我先肯一齐”。

节目中，发哥带主持人鲁豫体验“发哥日常”：行街市。一入门就开始好熟络噉同各个档主打招呼，行成日买菜嘅档摊，仲爆料发嫂每日喺街市都“呃饮呃食”。

发哥同摄制队更去到水果店吃榴莲，发哥搞笑噉话：“噉样行一个圈返屋企都唔使煮饭啦”。

市民求合照从唔介意被打扰，发哥：“几秒算什么”

经常喺九龙城出没嘅发哥，周不时都会俾市民野生捕抓，要求合照。俾问到：“有没有觉得被打扰”时，发哥相当亲民噉话：“几秒的，几秒算什么”

发哥自言：“我是一个很闷的人”

发哥喺节目中被问到，“你觉得（发嫂）嫁给周润发，辛唔辛苦？”发哥就表示自己系个好闷嘅人，担心发嫂日常都会好闷。

透露每日做完运动就会成日留喺屋企唔出门，一度被发嫂误会“有病”。但系，作为陈荟莲嘅老公，发哥就直言：“有她的照顾，我开心到不得了，感觉好舒服”

做周润发老婆难唔难？发嫂：“做自己最紧要”

另一包厢，发嫂被问及：“做巨星嘅老婆系咩感觉？”发嫂则表示将自己当成普通人一个，冇挂住做“周太”，喺佢睇嚟做每件事都唔需要太睇重“条件”。

结婚系惊喜 发哥：“唔想亦唔应该给她包袱”

周润发曾经历一段失败婚姻，所以喺佢同陈荟莲交往个阵，曾直言“你要记住，我不会娶你”。发哥喺节目中表示：“我觉得不想给她包袱，也不应该给她包袱。”

发哥曾经认为“两个人走在一起，应该不是为了结婚”发嫂亦从来冇谂过要同发哥结婚，或许系因为爱一个人系无条件啩。

直到1986年，发哥去纽约拍《秋天的童话》，发嫂以女友身分同行。当时发哥通宵拍戏，朝早7点先收工，突然对发嫂提议“我们不如结婚”。

付出太多，发哥：“应该要给她一个名份”

发哥终于感受到“她为我付出得太多，我觉得应该要给她一个名份”突如其来嘅求婚，冇玫瑰同戒指，但发嫂都系应承咗。发嫂谂返起：“当日一早，两个人就去了教堂签证，给了15块美金，就结婚了。”

发嫂：“佢（发哥）追咗两年我先肯一齐”

发嫂自言自制力极强，同发哥相识两年，依然“未敢”去爱。发嫂透露，当时根本唔识“周润发”系边个，朋友介绍就系噉意应承去见面。

啱啱相识个阵，发嫂认为发哥好有魅力，好迷人，但当时听过“太多不好的传言”，以至于佢唔敢去爱。

两年时间，发嫂亦唔会担心发哥突然“走咗去”，佢认为做女人要对自己有信心，而两个人相爱系讲求“缘分”。

经过发哥两年间穷追不舍嘅约食饭、打电话、写情信…发嫂终于被“收服”。

周润发谈丧女之痛，乐观性格鼓励太太走出伤痛。

发哥自言当时好快就释怀，“因为两个人同伤悲，对任何一方都没有好处。我只有不停的鼓励太太。当时我处理压力的方法很简单，就是做运动、爬山。出出汗就好了。最重要是性格，我特别的乐观，甚么都不看重。”

发哥更引用《卧虎藏龙》一句自己最喜欢嘅电影对白“把手握紧，里面什么也没有；把手放开，你得到的是一切”。又形容自己而家系开朗、开心、有活力的人。

周润发 一生至爱两个女人

讲到感情世界，发哥自认花心，只要系靓女都欣赏。更指喺电影中拍过好多次拖，虽然戏系假嘅，但投入嘅感情都系真嘅。发哥指同郑裕玲（Do姐）演过最多对手戏，喺电视台拍剧个时有两年嘅时间，每日睁开眼就见到郑裕玲。发哥指当时两人嘅关系既系朋友又系“女朋友”同“老婆”，好甜蜜。

而谈及一生中最爱嘅女人，他就指系母亲同太太。

发哥对未曾睇过佢电影嘅观众推介《秋天的童话》，因当中故事简单，爱情不华丽，贴近生活。

圈中模范夫妻

婚后，发嫂尽心竭力做好妻子嘅角色，系娱乐圈嘅模范夫妻，她更成咗发哥嘅贤内助、经纪人。

1991年时，发嫂有咗！两夫妇都好高兴，仲一齐布置女儿房间。一直以嚟发哥都好钟意小朋友，发嫂怀孕期间，他经常伏喺发嫂嘅肚皮同BB讲话，可惜，当BB仲有两星期就出世之际却被判咗“死刑”。多年后，两夫妇先道出“32年无子真相”，当时B女系因为脐带缠颈致窒息而死。

发嫂用七年时间走出阴霾

发嫂曾喺接受访问个时讲到：“当时我选择顺产把BB‘生出来’，不过产后，护士迅速抱走了她，因为老公不想我见到她而再受打击。”十月怀胎嘅女冇咗。事后发哥静鸡鸡清理好预留畀BB嘅房间，更加喺事情发生后，每日都陪住太太，结果，他们用咗七年嘅时间先走出阴霾。

发嫂表示，对再怀孕仍有恐惧，而自从呢次之后，发哥再冇提及生BB嘅话题，因为唔希望老婆感到有压力。

自91年发嫂陈荟莲不幸小产后，发哥发嫂一直膝下犹虚，但原来他们多年前已选择领养儿童，不过原来呢位养子就系发嫂嘅姪仔，早于90年代已去澳洲留学！

拍戏赚钱系规矩

已经讲过愿意裸捐嘅发哥，喺娱乐圈打滚数十年，自然家底丰厚。但对于拍戏收取片酬一事，就好有自己嘅看法。

当主持人陈鲁豫问，可唔可而唔收钱拍一定攞到奖嘅电影，发哥就话“肯定不会”。他认为赚钱及片酬系应该有嘅过程，每个人都应该守规矩。

发哥直言唔计较奖项得失，因为佢享受演戏：“重要的是过程，演戏已经乐的不得了，没有拿到奖也没有失望过。导演说cut的时候就拿了奖，在环境里头已经拿到最好的。拍戏最终的目的是要生活，要吃饭，不是为了拿奖。”发哥始终认为电影系一门生意：“香港是个很现实的地方，要求你表演，拿到票房。跟著这个方向走就行，不需想太多。”

发哥爱妻金句

又话唔结婚，点解会改变初衷？发哥对发嫂说：

“呢几年我一直都喺度观察你，觉得你系适合同我过埋下半世，噉咪同你结婚啰。”

知道发嫂对再怀孕仍有恐惧，发哥对发嫂说：

“老婆，只要你喜欢就得，有冇小朋友都唔紧要，千祈唔好有压力。”