一套剧好睇，除咗主角，配角都好重要！好似喺无綫热播中嘅新剧《木棘证人》，饰演张曦雯（Kelly）闺蜜嘅徐玟晴（Kimmi）咁，去年就喺《她她她的少女时代》中，同样饰演主角好姊妹而弹起，不过原来佢今个月已约满无綫，《木棘》系佢离巢前倒数嘅第2部作品！

Kimmi入行14年，系《一掷千金》嘅“千金小姐”，之后2006年参选港姐，不过复试落选，但仍无碍其演艺之路，参加第21期无綫电视艺员训练班入行，李美慧都系佢同学！2008年，佢首次演出无綫剧《银楼金粉》，之后就无间断咁拍剧，其中喺《醋娘子》同胡杏儿及罗子溢（罗仲谦）合作，做婢女“荔枝”而令人认识！产量极多嘅佢拍过唔少大热剧包括《多功能老婆》、《降魔的2.0》、《那些我爱过的人》等，喺《BB来了》饰演港妈阿宝，临生都要摆甫士狂影相，令人发笑！又试过喺《金宵大厦》Cosplay成美少女战士饰演凤姐勾引陈山聪，虽然身材激凸，但佢就笑言只系装假狗，而佢嘅告别作就系仲未出街嘅《香港爱情故事》！

现年37岁嘅佢，身材依家Fit爆，加上衣着打扮都保持年轻，网民都大赞佢保养得宜，完全睇唔出已经仲有3年就40岁！而佢曾经与小鲜肉余德丞（Dickson）传绯闻，当年踢波后晕倒入院，Kimmi立即赶到医院了解，两人感情要好！