佘詩曼粒癦會趕走男朋友，令佢難覓姻緣？

主播Kiwi、李居明師傅

【on.cc東網專訊】 2016年娛樂圈喜事多籮籮，一班女神先後正式「封盤」，有啲仲生埋BB，升呢做靚媽。其實，唔少女星樣靚身材正，偏偏感情未有着落，唔通「筍盤」都冇人吼？東網巨星推出嘅節目《玄學星相》，最新一集邀請到堪輿學家李居明，以玄學角度拆解圈中單身貴族嘅感情世界。

首先，就快36歲嘅鍾欣潼（阿嬌）雖然被公認為大美女，但近年一直單身，就連佢本人都講過心急想嫁人，唔知佢喺新一年感情有冇着落？李居明說：「鍾欣潼喺2017年行乙木，即係屬於情人星，所以未有着落。要到2019年先會遇到真命天子，但佢到時都係收埋唔畀人知，直至2022年先會曝光戀情，因為嗰年佢可能會有BB。」

李居明續指37歲嘅女星周麗淇同樣喺2019年都有着落，未來佢仲為家庭放棄事業，專心做少奶奶：「水代表佢嘅財星，如果佢有男友就代表木，而木吸水，即係趕走啲錢，所以佢未來遇到真命天子，一定攬住老公唔要錢，而且唔使佢搵錢，靠老公搵就得！」

至於，現年41歲嘅佘詩曼緋聞多多，但真命天子始終未出現，原來佢亦有望喺2019年拍拖，不過李居明就提醒佢：「佘詩曼有一粒叫做趕走老公嘅癦，喺面嘅『奸門』位置，如果佢一日唔脫粒癦，永遠都係孤芳自賞，趕走啲男朋友。」想繼續聽師傳點講？只要Click入東網巨星，睇《玄學星相》就更啱Feel！