喺《是咁的 法官阁下》饰演黄智贤徒弟嘅大律师林秀怡，网民大讚佢演技，劲LIKE！成个邻家女孩咁款嘅佢，现实系天水围单亲家庭，一个坚强孝女写照，搏命做野，节衣缩食，为嘅系搵钱医患癌嘅阿妈。

单亲孝女林秀怡花光十年积蓄救患癌母亲

(请链接wifi观看）

▼

八岁就父母离异嘅林秀怡，自此同妈咪住公屋相依为命。有指林妈十几年前跌伤之后，唔可以再工作，所以林秀怡十七岁中学毕业，就担起头家。

入行前喺惠康超市做过收银，08年佢考入艺训班，四年前人工都仲系得七千，捱到今日据知底薪都只系得一万，为左搵多啲钱养家同应付妈咪医药费，拍剧同时试过身兼三职，网上卖避孕套，又俾人发现喺尖沙咀一间日本餐厅做侍应。

一直节衣缩食，著烂衫返工都唔肯买新衫嘅佢，目标只有一个，储钱脱贫，俾阿妈生活好啲。点知今年初，佢妈咪患上cancer，为左救阿妈，佢将十年嚟辛辛苦苦储起十几万血汗钱，用晒黎医阿妈！

早几日，我地发现唔使开工嘅林秀怡，街坊装落楼，陪住抗癌嘅妈咪去公园散下步，第二日，著返同一件衫嘅佢，拖著阿妈去买餸，十几岁就开始孭起头家嘅林秀儿，佢似阿妈照顾个女一样，全程拖实阿妈行街市之馀，买咩菜、俾钱，统统由佢负责。

虽然出身卑微，但林秀怡从来冇埋怨，喺大台捱住低收入嘅严寒日子足足七八年。为悭钱，佢一收工就返屋企，好少娱乐。入行头几年，有同事收工嗌gathering，林秀怡一个月都只系参予一两次，佢同朋友讲，唔会因为咁唔开心，因为天水围好多家庭都系咁，佢唔觉得自己系最惨嘅一个。

不过几硬淨嘅人，都会有顶唔顺嘅时候，喺大台初期，做紧二打六时，因为面对生活压力，佢曾经话:「唔可以俾阿妈知，所以返屋企要趁冲凉时喊，捏住个鼻喊就冇咩声。不过我性格乐观，好快冇事。」

拍左十年剧，默默耕耘嘅佢或者对外界黎讲唔算起眼，但好多监製都留意佢，事关佢为生活，佢喺大台出左名勤力兼搏命，深得好多监製痛锡，近年演出机会越嚟越多，上年佢俾华星冰室老板，亦系圈中经理人嘅文涤睇中，签为旗下艺人。

 其中一日佢就约左呢位经理人倾公事，希望林秀怡之后有更多机会，妈咪又抗癌成功，等呢个天水围孝女可以鬆一口气啦！

曾靠同行接济！著蔚雨芯旧衫，用赵希洛转赠化妆品

喺大台一个月得$7000，仲要养埋阿妈，林秀怡真系衫都唔敢买多件，所以圈中好友蔚雨芯会将啲著过一两次、未剪牌嘅衫俾左佢；依家呢个年代，人靠衣装未够，仲要靠埋化妆，好彩赵希洛亦够老友，会俾啲化妆品佢用。

除左节流，开源同样重要。林秀怡除左曾经喺食肆打工做侍应，早年亦趁某啲日本品牌condom尚未打入香港市场，由日本拎货返港喺网上售卖。不过无耐后该品牌喺香港流通，搞到林秀怡有一大堆货积聚卖唔出。呢个时候又有贵人帮手，Toby梁靖琪帮佢买晒再分俾朋友。

生活艰难，唯有搵命搏，《怒火街头2》就系一个机会。当时监製要搵个女演员，喺冬天十几度之下扮裸女半天吊，搵过几个演员都唔肯，系得林秀怡一口应承，监製好欣赏咁话：「下次再开剧一定预埋佢。」林秀怡出名搏命又抵得谂，今年终于等到戏份吃重嘅角色，仲要系三大台庆剧之一。演艺事业有突破，又拎左笔积蓄同朋友喺旺角女人街开日式意粉店，正式做老板。