藝人舒淇同老公馮德倫結婚兩年，私生活一直非常低調，二人甚少喺社交平台上公開放閃。日前馮德倫罕見地分享自拍黑白照，兩人眼神都流露出幸福。舒淇呢日「回禮」喺社交網大晒同老公嘅甜蜜自拍，相中二人都戴上鴨舌帽，同樣身穿黑色衫。

負責揸機嘅舒淇戴上眼鏡，只露出側面，而馮德倫則單手托頭，望住鏡頭微笑，睇得出佢心情幾好。舒淇淨係留言話：「落~~~ Good evening」雖然佢無太多嘅文字形容，但從照片中睇嚟，兩人相當甜蜜，非常享受二人世界，好多網民都留言話好閃呀！