佢系现代粤语流行歌曲嘅开山鼻祖，谭咏麟尊称佢为“歌神”，佢仲系张国荣嘅偶像，同张国荣同台合唱过《沉默是金》令观众拍烂手掌。佢就系许冠杰，岁月不经不觉流逝，歌神许冠杰已经超过60岁嘞，个样已经冇可能再系后生嗰阵嘅官仔骨骨、清靓白净嘞，但系咁多年来，佢冇绯闻、唔炒作，热爱音乐、热爱家庭，真系令人心服口服嘎，佢真系好多好多明星歌手做人嘅榜样啊。
许冠杰，1948年出生于广州市，毕业于香港大学，佢喺电影同音乐方面都好有成就，电影最为人所关注嘅就系许氏兄弟齐齐上阵演出嘅《半斤八两》等等系列电影，风趣幽默，市井气息浓厚。许冠杰1967年担任莲花乐队嘅主音歌手，同年发行首张专辑《Just A Little》。 1970年以个人身份发展。1971年凭借创作嘅歌曲《铁塔凌云》受到关注。1974年发行嘅粤语专辑《鬼马双星》，揭开了香港粤语流行乐坛嘅序幕。1981年由他创作嘅歌曲《印象》获得第4届十大中文金曲奖。1985年获得第8届十大中文金曲奖金针奖，成为首位获得这项荣誉嘅香港歌手。1986年在十大劲歌金曲颁奖礼上获得劲歌金曲荣誉大奖。1991年凭借《沧海一声笑》获得第10届香港电影金像奖最佳电影歌曲奖。1992年宣布退出歌坛，并且喺香港红勘体育馆举行41场“告别乐坛演唱会”。2005年获得CASH金帆音乐奖音乐成就大奖。 2010年—2016年，陆续喺广州、上海、香港举办演唱会。
许冠杰嘅歌，通俗易懂，除咗充满香港小市民谐趣搞怪嘅自嘲心声之外，慢歌好多都系柔情蜜意、引人入胜，用显浅嘅歌词，润物细无声噉样教育大众好多做人嘅道路，朝气、励志、好有正能量。譬如《这一曲送给你》，就系一首旋律优美、歌词very good嘅，非常之好听嘅歌曲。《这一曲送给你》呢首歌由许冠杰作曲，许冠杰同黎彼得作词。歌词系噉样嘅：
“如果君心里/常觉有顾虑/前景感到崎岖/人生有若游戏/他朝总有转机/如果君心碎/常暗自下泪/何必感叹唏嘘/还希你莫嫌弃/这一曲送给您
我愿能助您郁结消除/结伴同寻新乐趣/我愿凭乐韵解君寂/此曲望您惜取/如果君他去/惆怅未入睡/难堪枕冷空虚/还请您梦乡谨记/这一曲送给您/请君您梦乡谨记/这一曲送给您”
人生路上，试问边个冇失意彷徨嘅时候呢？面对挫折，我哋系唔系就垂头丧气、一蹶不振呢？歌神话畀我哋知：“人生有若游戏，他朝总有转机”。伤心难过的时候，正确嘅态度应该系睇开啲，希望能够借助音乐嘅力量帮助烦恼之人消除郁结同寂寞，惆怅同失意，多么温馨同暖心嘅一句“这一曲送给你”！伴随悠扬乐韵，声声鼓励通过歌声传达，就好似企喺茫茫路上，茫然无助嘅时候，竟然有咗漆黑夜里嘅荧光棒，神奇嘅魔法棒，光明同希望骤然而至。
阿sam就好似有个知心哥哥，静静噉倾听你诉说烦恼同苦闷，微笑噉点头表示理解，轻轻噉摸下你个头拍下你膊头，然之后话畀你知：遇到唔顺心嘅事情，系生活中嘅常态，每个人都唔会例外，积极嘅态度唔应该耿耿于怀、悲观颓废，而系应该睇到黑暗尽头系黎明，暴风雨之后系宁静，风雨过后系彩虹……凡事要做好最坏嘅心理准备，最坏嘅结果都承受得起，但系同时，凡事都要向好嘅方面惗，愿望在明天，人生满希望！
有朋友话：如果你冇听过许冠杰嘅歌，就唔可以讲了解、知道粤语流行曲。只有听懂佢嘅歌，先至算系真正懂得粤语歌曲。我都好同意呢种观点。香港系港产片同粤语流行歌曲嘅发源地，香港电影得人钟意嘅地方，就系呢份本土能量。香港电影从黄梅调转向邵氏武侠之后，许冠杰来嘞，佢用最通俗易懂嘅粤语方式唱歌，打破咗当时香港乐坛嘅格局同面貌，因为上个世纪60年代嘅香港人，一系就翻唱英文歌，一系就唱老上海啲歌，系视粤语歌为下品嘎，系完全冇地方语言色彩嘅好歌曲冇体现自己文化特色嘅好歌曲噶，许冠杰独辟蹊径，突破限制，用生动直白嘅粤语白话来写歌，唱来流畅自然，大受香港人欢迎，使到粤语歌曲直接得以登上大雅之堂。
其实，点止呢一首《这一曲送给你》啊，许冠杰送畀听众歌迷嘅经典歌曲一箩箩。值得一提嘅系，好似《铁塔凌云》呢首歌，就系许冠杰唱嘅第一首广东歌，喺旋律上系粤曲粤韵，喺节奏上系英美乡村音乐风格，但真正叫人在意嘅系歌词，系香港首届影帝许冠文，亦即系许冠杰佢大哥所写嘅。白金唱片销量嘅专辑《难忘你·纸船》中具有西洋气质嘅情歌《难忘您》，《念奴娇》呢张专辑嘅同名歌曲，拿过1981年嘅第五届“金唱片颁奖礼”白金唱片大奖，从呢张专辑开始，许冠杰将粤语嘅俚语引入到情歌之中，并且由此创作出一啲曲调轻松嘅歌曲。
许冠杰嘅歌，有鬼马俏皮嘅《锡晒你》，有带有中国古风嘅《断肠梦》，好似《父母恩》呢种歌曲，与而家流行乐坛总系情情塔塔、谈情说爱大相径庭，确实叫人怀念嗰个流行音乐嘅黄金年代啊。许冠杰创作嘅歌，最厉害之处就系雅俗共赏，题材多样，有接地气嘅口语化歌曲，又有中国诗词古风同埋充满西洋气质嘅歌曲，呢个就系一个成熟音乐人嘅标志，多样化嘅创作。点解许冠杰喺香港音乐坛地位咁高，系因为从佢开始，香港人民先至接受并且喜欢粤语歌。佢系粤语流行歌曲嘅始祖，歌曲基本都系自己原创，比较通俗，经典名曲非常多，《这一曲送给你》，首首都送畀你，而家慢慢重温，依然感觉非常美好！
作者简介：王小女子，一个从小就热爱文学和音乐的小女子，个人公众号：王小女子（gh-9abf8a3205fe）。
你可能还想看：
谢谢你的关注和支持
转发和推荐是最好的鼓励
长按以下二维码
可关注“王小女子”的公众号
感谢您的支持鼓励，我会继续努力的!
文章地址：
用户邮箱：
打赏金额：USDT
点击”去打赏“，即可进行打赏支持本文章哦
