伍咏薇（伍姑娘）老公练海棠被拍得与34D长发女约会，还被指车震「偷食」2个钟！伍咏薇今日为有线节目录影，交代事件，期间多次代老公跟大家鞠躬道歉，表现大方得体！

第一反应：吓一吓

因要配合传媒各方要求，伍咏薇就事件作出多次回应，而接受纸媒访问时，被问到看到偷食短片时的第一个反应，她直言：「吓一吓，行出厅再睇清楚条片，消化左先，我发觉自己几冷静，跟住先去叫醒老公，同佢讲，喂！醒一醒，睇吓发生乜野事？！可能大家会估计，我会大吵大闹，但我唔会，虽然平时我大癫大肺，但只不过系喺娱乐圈嘅个性，我处理事其实都会比较冷静，先问左发生乜野事先？奈何，今日要好早出门口，所以，我同佢都只系倾左个多小时，了解件事嘅一小部份，依家你问我，我只可以答，做完野，返屋企闩埋门，了解家事当中。」

认最近冇沟通

伍咏薇直言看到短片第一刻有不开心，她谓：「睇到嗰一吓，会唔开心，但另一方面，我会谂吓自己，我唔会怪晒对方，系咪我疏忽左家庭生活呢？呢个可能系我天真咁谂，系咪我最近好忙，工作太密集式？因为我啲访问稿，我会用手打一次，我一抄要两、三小时，所以夜晚都冇乜同佢沟通，所以，佢可能就曳曳，但应该冇你的幻想同估计咁多。」

会否离婚：唔系咁容易

伍咏薇又讲明回家后会继续了解事件，问到若发现偷食事件属实，会否离婚？伍咏薇谓：「唔同年龄，有唔同想法，唔系咁容易，我了解左一半，重点野问左先啦！大佬，唔会由头说起，电影都系睇结果，鬼片最终究竟有冇鬼先，知道重点，先放心出嚟做野。（信唔信？）我作为家人，我嘅态度系，你的作为记者，对唔住，或者市民，你的可以去评论，但唔可以睇我点谂，应点样去处理，我回家了解件事会再谂。」

唔识34D女：识仲嬲

伍咏薇直言不认识短片中女子，她谓：「最好唔识啦！识仲嬲，话畀你听，吓，原来系陈敏之，如果系真，会嬲㗎，对唔住陈敏之，我咁话你，原来系袁咏仪，又点算呢？人妻，死喇！（以后花多啲时间陪老公？）可能如果每个人发生事，总有原因，唔会怪晒对方，我都会花时间，如果件事顺畅，我都会检讨自己，花多啲时间陪佢多啲，如果佢凼得我欢喜嘅话，都要嘅。」

7月结婚17周年：反佢又点算家人呢？

「今年七月，我的就踏入第十七年婚姻，个底好强，讲真，记者写一啲说话，几难听，我唔介意，一段关系，踏入十七年唔系短嘅时间，作为家人、丈夫，呢一个时候，虽然未了解全部，我都需要支持佢，依家反佢，呢啲又点算系家人呢？所以，多谢大家关心，唔好意思，令大家、粉丝担心，我代练海棠同大家讲声对不起！」

谈老公：佢已有应得报应

会否叫老公出来回应？她谓：「唔会，佢已有应得嘅报应，畀狗仔影到，佢系圈外人，你问佢，佢都唔会答，我亦叫佢无需要向外答，我代佢答，我系好冷静，只系有小小唔开心，畀啲间时间我去坚强面对。」

“呢个礼拜劲审佢”

问到七月一日会否继续庆祝结婚周年，伍咏薇说：「年年都有时会搞，同朋友庆祝，今年仲系计划紧搞唔搞之间，我自己系想二人世界，系咪应该多番啲时间，多啲人，未知，最近工作太密，冇时畀我出来约朋友，唔系话吹鸡食饭，可能系低调庆祝，要再谂吓。等我今晚番去小完佢、劲审佢，不过今晚都要继续做野，等我呢个礼拜劲审佢，所以你的应该见唔到我的喺街，狗仔队可以休息！」

唔知会否再畀机会老公：冇野系一定

再问会否畀机会老公，她说：「我唔知，我要听晒故仔先，机会都要畀人嘅，但系听左故仔先，冇野系一定，有啲保留先。（跪玻璃？）咁又唔使，其实我系一个好SWEET、好明白事理嘅女人，等我平心静气听埋个故仔先，畀机会系畀佢讲，唔应该一味单向信晒报道，无论朋友或者丈夫，都要畀机会。（佢有冇认真讲对唔住？）佢话唔好意思，出嚟要面对咁多记者，佢食餐饭，我就要出来解答，变左佢嘅经理人，讲左声唔好意思，未至于讲对唔住，如果讲对唔住即系做错事，所以呢个问题我答得好妙，希望佢唔好同我讲对唔住，你去食饭，我出嚟答，所以我要好镇定好坚强去答问题，好多谢各大记者锡住我。」

“坚持唔学煮饭”

问到是否唔再畀女仔埋老公身，伍咏薇说：「系双方面，唔系突然有摄石，大家互相检讨吓，唔会因为咁唔畀佢同女仔食饭行街，我依然会畀佢去做，系咪要咁热情，由自己决定，唔系话呢样嗰样唔淮咁，每个人有自己嘅生活，不会去改变，最重要尊重珍惜对方。（十七年嚟有冇曳过？）试过畀狗仔捉到，嗰次真系冇野，完全系交产品畀嗰位女仔，我知屋企冇饭食，我唔煮饭又唔叫外卖，但我坚持唔会学煮饭。」

“你愈冷静处理，男人就愈惊”

其实伍咏薇今日就事件多度接受访问，佢喺另一个场合受访时，言辞更辛辣，佢话：「个女仔识唔识唔重要，毕竟一隻筷子敲唔响，段片都影到佢出去食饭食得几开心，好似初恋咁样，抵佢畀人影到。之后会唔睬佢，打佢屁股，你愈冷静处理，男人就愈惊。作为一位成熟嘅太太，一位另一半，唔好信晒段片先，虽然系冇得走鸡，要承认系真事，但问佢了解吓先，同佢了解晒之后，之后会点处理，就唔会再同记者交代，今次系最后一次公开讲。」

暗示真偷食冇弯转

「今朝真系太短时间，会问左佢个结局，有冇做嗰啲咩先（作状吹口哨），同原来有嗰啲野，我就真系冇野讲，我信任我先生做野冇大家谂到嘅咁複杂，会问左佢个结局先，返去再做再审判，今次真系要多谢有人帮我影到佢曳曳，佢唔需要再受罚喇，咁样被追问已经系惩罚。」