系呢个普天情侣同庆，单身狗独自喺一二边痛哭嘅大好日子，身为你哋知心小天使嘅阿咩，肯定要为你哋做返啲嘢！

所以我特登精选咗香港爱情电影之中，11种唔同类型嘅表白！一次过伤害你哋到够皮！

（至于点解系11种，你估下~）

“我嘅生命线、事业线、爱情线，全部都系用你个名拼成。”

——许港生（黎明 饰）

1998年《玻璃之城》

▲喺韵文生命之中，遇到港生咁样嘅男人，被港生如此深爱，无论最终结局系点，都已经无憾。

“男又好，女又好，我净系知道我中意你。”

——顾家明（张国荣 饰）

1994年《金枝玉叶》

▲性别错位畀咗顾家明一个考验，最后佢终于发现，佢就系中意林子颖，爱就系爱，无关性别。

“辛苦还辛苦，你几时得闲嫁畀我？”

——林浩君（金城武 饰）

1999年《心动》

▲最霸道嘅表白，已经唔需要再讲其他。

“（手语）我爱你”

——阿水（古天乐 饰）

1999年《甜言蜜语》

▲最沉默嘅表白，依然无法掩盖哑仔阿水对雯雯嘅痴心。其实面对爱情，作为正常人嘅我哋，咪都会瞬间变成哑巴咩。

“我养你啊！”

——伊天仇（周星驰 饰）

1999年《喜剧之王》

▲简简单单四个字，胜过千言万语，讲出嚟嘅就系一生一世。

“黎耀辉，不如我们从头嚟过。”

——何宝荣（张国荣 饰）

1997年《春光乍泄》

▲何宝荣一句话，黎耀辉一次次返转头。有时候爱情放唔低，唔系真系因为放唔低，而系唔想放低。

五大目标：

学海无涯，为勤是岸；

攞完绿咭要攞金咭；

着鞋要着袜；

英文讲Grammer；

想做就去做，船头爱茶煲。

——船头尺（周润发 饰）

1987年《秋天的童话》

▲为中意嘅人改变自己，提升自己去衬佢，呢度系一个邋遢麻甩佬嘅爱情，平凡而笨拙，简单又直接。

“n 55!w!”

——张志明（余文乐 饰）

2010年《志明与春娇》

▲看似系一堆乱码，背后系曲折缠绵嘅情意，其实一句 “i miss u”比“i love u”更加令人动容。

“你咪要搵王家欣咩？我咪系王家欣咯！”

——王家欣（吴千语 饰）

2015年《王家欣》

▲一个傻女陪一个傻仔搵佢中意嘅女仔嘅故事，其实最爱傻仔嘅人一直喺傻仔身边。

“就算你唔系依家呢个样，我一样会中意你。”

——Jeannie（张柏芝 饰）

2000年《十二夜》

▲无论发生咩事，我依然唔后悔遇到你，爱上你，可惜，隔离陈奕迅嘅表情已经说明故事嘅结局。

以上11种表白，

边种最直击你嘅心底？

阿咩喺度表示，

仅有最后一种代表我嘅立场！

最后祝大家情人节快乐！

部分图片素材出自豆瓣电影

羊城网负责整理编辑