拎奖升呢脱贫！菊梓乔揸逾20万靓车出巡

现年32岁的歌手菊梓乔（Hana）小时候父母离异，两姊妹亦先后被遗弃。为了照顾妹妹，Hana 13岁便辍学，随后投身社会工作赚钱维持生活。而她更做过超过20份工，亦试过穷到冇钱，要一个即食面分两餐食，生活十分艰辛。但自从Hana签约星梦当歌手后，事业发展顺利，早前更在颁奖礼夺得「最受欢迎女歌星」奖！成功「脱贫」的她，最近「升呢」驾驶出产自法国、价值约20多万港元的新款私家车出巡。为保「饭碗」，她亦大手笔花钱做Facial Keep靓样。

生活质素得到改善的Hana，日前在电台工作后独自驾驶出新车离开，前往尖沙咀一个停车场泊车。她发现有记者后，友善地笑笑口挥手打招呼，之后步往附近美容院做Facial扮靓。为怕被途人认出，她步出大街前急急戴上口罩。逗留约两个多小时，做完Facial的她亦戴住口罩离开，期间边行边低头揿电话，施施然步往停车场取车，然后再驾车到旺角。Hana在停车场附近会合一女友人，再到附近大厦出席朋友饭局。

失联25年！阿Sa重遇工人姐姐许诺报恩

艺人蔡卓妍（阿Sa）喺社交网分享一件开心事，就系佢搵番失联达25年嘅工人姐姐Eden！阿Sa透露系爸爸最近终于搵到对方，仲话Eden系佢人生入面一个重要嘅亲人，由佢2岁开始照顾到佢小学三年班，更难得嘅系多年嚟，大家都冇忘记过对方：「没见那么多年，一见面大家都热泪盈眶，她说她换了很多个银包，但是银包里还是会放着我小时候的照片。」阿Sa又自言细个家境唔算富裕，父母都要为口奔驰：「但是爸爸妈妈仍然给我最好的生活，也让我可以认识到Eden姐姐，Eden姐姐可以说是参与过我人生里面其中一个十分重要的人。」

阿Sa亦分享Eden姐姐嘅陪伴，令小时候嘅佢得到唔少温暖：「她一直陪伴着我，我们甚至剪了一样的发型，她陪我到公园嬉戏，我陪她到我家附近的美容店做facial，我们一起看电视、一起唱歌、一起祈祷，她时常都会用她的工资请我吃零食，还会给我买小礼物。有时爸爸妈妈星期天要加班，Eden姐姐也会带着我去参与她和朋友的假期活动，反正那段时候我们一直形影不离，直至她要回菲律宾⋯」当时科技未算发达，要保持联络实在唔容易，依家可以见番对方都真系好有缘！阿Sa仲话会喺以后嘅日子报答对方为自己付出嘅青春同爱。

少妇联盟浴照进化版　大肚陈凯琳逼爆浴缸

前港姐陈凯琳（Grace）搞baby shower，「少妇联盟」龚嘉欣、沈卓盈及谭凯琪当然有到场啦！大家仲记唔记得佢哋影过辑「泳衣浴缸写真」呢？今次佢哋嚟个五人进化版，摆番上次啲甫士，但亮点系就嚟逼爆浴缸呀，谭凯琪喺Instagram上载「浴照」留言：「喂喂喂已经好逼　再多几个就要搵个泳池喇」！

而着上超低胸装佗住B嘅Grace若隐若现非常性感，龚嘉欣就大晒长腿及香肩，睇嚟到时「少妇联盟」都要改名喇！

懒理负评！45岁李若彤再扮小龙女冇压力

艺人李若彤应好友曾志伟之邀出席慈善盘菜宴，她透露今次是首次参与，志伟几天前才突然通知她。现年45岁的她，早前在内地节目上扮演曾饰演过的经典角色「小龙女」，问她有否压力？她坦言：「又唔系第一次扮，三年前扮过一次，反而95年第一次扮有压力。因为未摸索到，唔知头同妆配唔配合到，第一次唔系扮得咁好，后来就搵到合适嘅头发同化妆。我年龄增加咗，智慧都增加咗，我冇乜所谓！希望畀一个回忆大家，喜唔喜欢冇所谓，我系为咗畀喜欢我嘅人睇，有啲人批评，咁每个人心目中都有自己嘅小龙女，我又唔系做畀你睇，唔介意人哋讲乜，我依家觉得开心，想做就去做，唔需要同人交待。（会扮到几多岁？）最重要系场合适合，硬夹扮嘅话唔适合，但当日嘅场合我觉得咁做系好自然。」

提到新年，她表示会一家人旅行度岁：「上年新年去咗日本，今年去东南亚。（为咗避年？）唔系，而系有年我爸爸走咗，得番妈咪一个，佢唔想喺香港过年，所以就第一次同佢去旅行，唔想佢有伤心感觉，后来发现原来一家人旅行好开心，呢个习惯都有七、八年。」她又笑指一家人相处模式很特别，喜欢互窒：「外人唔知，以后我哋好唔和谐，但呢个系我哋沟通模式，系爱嘅表现，不过有啲初相识嘅人好唔惯，就问我呢个同呢个系咪唔啱，但其实系真爱嘅表现，大家唔理对方先大镬。」

分手后好开心！洪卓立做运动识到新女

歌手洪卓立（Ken）及许靖韵（Angela）到鹤咀清理废物，Ken表示是首次做义工清理垃圾：「希望都可以起到少少效用，每日执垃圾都真系清唔晒，源头最紧要，唔好乱扔垃圾。（香港人嘅分类意识唔强？）系呀，就算我住嗰栋大厦都冇分类桶，惟有自己分类。」而Angela就表示读中学时有做过这类型的义工：「我自己都会将垃圾分类，同埋会用环保袋，因为我觉得我哋点对大自然，大自然就会点样对番我哋，所以环保好紧要。」

讲到新年，Ken表示会与家人去内地拜祭婆婆：「成3年冇返去，我哋又冇话新年唔可以做呢啲。」讲到新年后就到情人节，问到今年单身的他过情人节可会特别感触及lonely？他表示：「唔系呀，都几happy！我呢排系咁做运动，都有识咗新朋友。（识女仔？）有男有女嘅。（有冇啲啱嘅人？）唔谂呢啲，呢半年识咗朋友一齐做运动，都好开心，会热血同勤力啲，互相督促大家。」而Angela就表示新年会去贵州工作，之后会到新加坡会合家人去旅行，两个地方都未去过。

拆石膏拔钢钉　黄宗泽赶去同苗侨伟拜年

邵氏网剧《守护神之保险调查》演员苗侨伟、黄宗泽、刘心悠、徐子珊和吴岱融等在葵涌出席《庆团年盆菜宴》，与耆英抢闸贺猪年。

黄宗泽早前拍摄剧集《飞虎之雷霆极战》时弄伤左脚，出席活动时仍要撑着拐杖行路，他说：「已经拆咗石膏同埋拆咗钢钉，依家做物理治疗，希望过年后好番。」对于可有影响剧集埋尾？他笑说：「我年廿八就收工，佢哋已经惯晒，片场有轮椅、高櫈、拐杖，打戏都系坐系轮椅度打。」苗侨伟笑谓给黄宗泽多点打戏是「优待」：「畀多啲动作起佢，即系优待佢，因为佢唔使拍有替身，可以休息吓。」两人又大赞汪明荃为剧集客串演出扮演特首，指除了她就要由乐易玲饰演。

黄宗泽指农历年初三会到苗侨伟屋企拜年：「梗系要佢煮鲍鱼畀我食，食番佢八只补番，仲要食鹅掌。」