繼上次有學生以為四大天王係一個組合之後，今次有人話唔識陳慧琳(Kelly)，仲話未聽過佢個名，當記者聽到受訪者咁講時，真係不禁倒抽一口涼氣，一時之間有點接受唔到，今次真係唔認老都唔得。

原來依家啲後生仔已經唔識得陳慧琳。

日前 ViuTV 節目《歌度有榜》進行街訪，問吓大家知唔知一些被翻唱嘅歌係哪些歌手原唱的。問到《最佳位置》時，雖然大部份人都答啱係陳慧琳，但其中兩名目測應該係00後嘅後生仔，當主持人畀兩個答案佢哋揀，「陳慧琳或趙學而」，其中一個估係趙學而，記者追問點解，佢話：「因為另一個我唔知係邊個。」之後記者問佢身旁嘅朋友識唔識陳慧琳，佢都同樣話：「唔識呀。」

其實 Kelly 間唔中都會蒲吓頭，除咗代言、廣告，仲有出吓歌。

無可否認，近年 Kelly 真係唔算活躍，雖然一年中總會蒲頭幾次，代言、唱歌、廣告都會間中見到佢，然而，可能 Kelly 的市場已經由全亞洲收窄到一班八九十後嘅人士。而且近年 K-Pop 熱潮席捲香港，大家都係追韓星，莫講話 Kelly ，香港新一代歌手都無咩人留意。

話晒 Kelly 都係香港一代天后。

雖然時代嘅巨輪從來不為任何人停下來，但話晒 Kelly 都係香港一代天后，1995 年 23歲 出道，今年已經45歲，曾經無人不識。連續六屆奪得「勁歌金曲頒獎典禮亞太區最受歡迎女歌星」，年年都毫無懸念地得獎， Kelly 當年可以話係紅遍亞洲，包括大中華地區、日本、韓國、東南亞以至國際其他地區都有極高知名度，影響力相當大。但自從 Kelly 結婚生子之後，就開始減產，雖然隔兩三年都會出吓碟，但比起以前每年量產三、四集碟嚟講，真係少咗好多。其實莫講話 Kelly 已經係兩子之母，當年著住校服去追星嘅學生妹，依家已經做咗人阿媽。

雖然 Kelly 已經 45 歲，但依然 Keep 得好 fit 。