歌手锺镇涛（阿B）为《流行经典50年》担任嘉宾，阿B在社交网站上载了一张化身“B贵妃”的相片，大呻家人只顾看宫廷剧《延禧攻略》，自己惨被忽视：“张相嘅效果系囡囡帮我加，唔系咁做都冇人理我，我冇煲剧，佢哋睇嘅时候，我有望吓，全部都系后宫话题，我听唔明。其实我十几年前拍剧做过皇帝，饰演雍正，为咗个角色仲去学书法。（你可以同小朋友讲吓历史？）但我读到雍正就冇读。”

阿B在节目中大唱多首金曲，笑言当为自己即将举行的个唱作热身：“我个演唱会主题系故事继续，系讲香港乐坛史，为咗演唱会特别写咗首新歌叫《新故事继续》，但首歌唔会出唱片。（个唱筹备成点？）全部安排好晒，请咗两代嘅音乐人负责，会有好多惊喜。（有咩嘉宾？）阿女锺懿会出现，其他嘉宾唔讲得住，有啲系你哋估唔到，总之会有惊喜。”

阿B自言有十年未开个唱，笑言：“今次唔开，唔知几时开，我等唔到70岁，冇力唱，希望系最好状态，但今次唔会好似以前咁Rock Show，但都好有活力，有啲粉丝跟咗我好多年，就住啲歌迷一齐玩，佢哋都跳唔到几多。”