唔止反馈社会　吴家乐最想教育下一代行善

艺人吴家乐时不时都会跟无线艺员、明星足球队齐齐作探访、义卖等活动，还不时会化身技工为有需要家庭提供维修服务，除不断反馈社会之外，家乐更希望以身作则教导下一代谓：「我哋经常都会同一啲团体合作，一齐踢波、探访老人院同帮一啲有需要嘅家庭做维修，我觉得呢啲系好有意义嘅，亦都会教育埋下一代。」

去旅行变阿四任劳任怨　梁汉文夹公仔凼女

有人话同小朋友去旅行好麻烦，但如果你有个好朋友同行就绝对冇呢个烦恼喇！近日郑希怡（Yumiko）一家同埋歌手梁汉文（Edmond）夫妇等人去日本东京旅行，身为Yumiko囡囡「梁浸浸」契爷嘅Edmond，除咗帮手照顾，又要「男朋友」上身夹公仔凼女！

当大家坐低饮杯嘢休息、影吓靓相嘅时候，忙到冇得抖嘅Edmond喺大家身后麻鹰捉鸡仔，真系少啲精力都唔得，但Edmond完全冇怨言，难怪Yumiko都要留言多谢对方，她说：「有人悠闲，有人好忙，辛苦后面的契爷。」

最甜情人节礼物　苟芸慧全套服务招呼老公

艺人苟芸慧去年下嫁赛车手陆汉洋，今年首次以人妻身份派利是，她穿上低胸白色连身长裙出席娇兰护肤品牌活动，表示新年不停畀人追问会否生猪仔，她说：「老公想生老虎仔，所以过多两年先，依家享受二人世界。」今天情人节苟姑娘表示会为老公送上全套私人服务，她说：「由做早餐畀佢食开始，佢要求咩我都会满足佢，做个最贴身最好嘅老婆。（唔系应该老公做咩？）系囉，可能结咗婚唔同咗，咁佢平时对我好好，今次到我服侍佢，佢物质上咩都唔需要，我以行动表心意，希望佢过最开心情人节。」

传授生B秘籍？林文龙笑黄翠如识捞朋友多

艺人林文龙、黄翠如、黄嘉乐及连诗雅等，下午于屯门出席无线新剧《致所有爱过的人》开镜拜神，场面热闹。

文龙被剧组尊称为「龙爷」，他却笑谓无论戏里戏外，自己都负责服侍「萧太」翠如。二人孖住受访，谈到首次以人妻身份派利是，翠如谓：「好多人恭喜我，好多朋友好似洪永城及农夫咁，专程揸车嚟攞利是，话攞个luck，陆永带埋囡囡嚟玩天光，小朋友开心过大人。（开咗几多人派对？）由年卅晚至初四。啲利是系佢（萧正楠）封嘅，我就负责煎糕，由煎得唔好，到依家煎到要赞自己。」文龙即笑谓：「佢派利是派得唔畅快，派嚟派去都系面嗰啲咋。」

当被问到是否准备「三年抱两」，翠如笑谓今次剧内自己有女儿。记者叫文龙「过两招」给翠如「追B」，他答：「我唔识，自然规律嚟喎。如果你要『做功课』实就你，做完访问你即走都得！」文龙又表示有去拜年：「不过冇翠如咁多朋友，依家连曹永廉都过埋档喇。（你都去佢屋企拜年囉。）唔得，日日百几二百人，去到村口冇邀请卡入唔到去嘅。」

翠如笑指整个剧组都以「龙爷」为首，文龙闻言即说：「睇我嗰日放饭食西定食中餐呀？虽然你喺无线唔系做咗好耐，但怪唔得你咁掂啦。」

连环冧啜杨明　庄思明High爆预祝32岁牛一

艺人庄思明同男友杨明早前传出今个月会宣布结婚，虽然仲未有声气，不过二人连楼都睇埋，真系打风都打唔甩。咁啱听日（15日）就系庄思明32岁牛一，佢同孖生细妹庄思华寻日（13日）就大搞生日P预祝，庄思明仲High到爆连环锡锡杨明添！

睇番寻晚嘅相同片，庄思明、庄思华同大家姐庄思敏齐人出席，当中仲有唔少得嘅杨明、黄心颖等，一大班人热热闹闹咁过，现场有晒气球布置，生日蛋糕都至少3个，仲有只由粉蓝色玫瑰砌成嘅巨型独角兽，睇见都觉Happy！不过好戏在后头，庄氏三姊妹齐齐影相准备吹蜡烛时，庄思明已经高兴到同孖生家姐咀嘴，之后佢又两次连咀杨明，见杨明衬好晒黄色衫Match女友，影相时又揽到实一实，果然系贯彻佢哋嘅烟韧作风。

马国明45岁生日　黄心颖整蛋糕变汉堡包？

新年做「跟得男友」同黄心颖返乡下拜年嘅马国明，寻日45岁生日喇！正在忙拍无线剧《降魔的2》嘅佢喺工作中度过，同剧演员刘佩玥、胡鸿钧（Hubert）及剧组人员送上蛋糕为佢庆祝，而Hubert仲祝佢：「早日成家立室工作满满身体健康！」

而另边厢，心颖就当然冇忘记啦，佢喺Instagram上载整蛋糕嘅相，仲搞到十指染上蓝色，但点知个样太似汉堡包，搞到网民笑言「今次够写实」、「个卖相…」，不过其实系保持神秘冇公开完成品啫！咁鬼Sweet，唔少人都赞佢入得厨房出得，又问佢几时整「老婆饼」呀，而佢就留言多谢汤洛雯悉心指点！

不过寻晚佢就去咗庄思明嘅生日Party，睇嚟个蛋糕系留嚟今日为马国明补足生日兼庆祝情人节噃！

周润发发贴封后　张静初为呢样嘢出席金像奖

内地女星张静初于英皇电影《无双》中一人分饰几角，令观众留下深刻印象，结果顺利入围「第38届香港电影金像奖」影后五强，曾两次获提名但最终与金像影后擦身而过的她，对于今次再有份角逐感高兴，她接受访问时说：「看到《无》片有那么多提名好惊喜，感觉眼睛都花了，仔细数一下有17项，想到现场会放17次《无》片的片花就觉得好震撼呀！我也为参加了这么好的作品感到开心（周润发看好你封后，说一定是你！）希望这部电影大丰收吧，我自己提名过几次，也没有拿过，都习惯了！哈哈！不过颁奖礼我一定会来，要到电场看那17次的入围片花嘛！」

晒索爆孕照！香香冧揽强强宣布佗仔

靓靓准妈咪岑丽香（香香）佗B已经七个月，趁住今日情人节，佢仲喺社交网上载同老公强强影嘅大肚孕照放闪，相中嘅香香着住黑色露背连身裙，笑得好甜咁揽实老公，香香以英文留言话：「To my forever best friend, I’m so lucky that God gave me the best partner in the world! I pray our little guy will grow up to be just like his daddy!（给我永远最好的朋友，我很幸运，上帝给了我世界上最好的伴侣！我祈祷我们的小家伙长大会像他的爸爸！）」令人揣测香香呢胎系佗仔，佢仲祝各位情人节快乐！

之后香香再上载一张独照，腹大便便嘅佢露出事业线，Cool爆咁望住镜头，真系超级辣妈，佢仲留言话呢个系BB嘅第一个情人节。