42岁嘅武打演员樊少皇同33岁嘅“宅男女神”贾晓晨（JJ）终修成正果结婚喇！佢哋喺去年11月先被踢爆入纸注册，原来佢哋已经静静鸡喺元旦（1月1日）注册结婚，真系恭喜晒！在微信朋友圈发现JJ同樊少皇注册嘅相，只见穿上Low Cut婚纱嘅JJ同穿上蓝色西装褛嘅樊少皇切蛋糕笑容一致，认真有夫妻相，个结婚蛋糕仲写住：“终身幸福！”添，签完纸后当然再嚟影多张相作幸福印证，最后一对新人仲晒无名指金色婚戒。

《东网》致电JJ，佢话冇谂过咁快公开元旦秘密注册结婚呢件事：“朋友圈真系唔安全，冇谂过张扬！”问元旦结婚，会唔会追个猴BB：“一切顺其自然啦！”对于金色婚戒款色比较传统，问系唔系父母所传？佢话：“唔系！去旅行时买，其实我依家目标都系想搞好自己工作先，嚟紧要宣传新剧《蜀山》，系Project，有稳定事业更重要，咁先可以照顾到家庭！”

至于樊少皇亦都好努力搵钱，见佢注册前一晚都特登喺内地夜场做骚，又唱又跳，超级落力，嚟紧6号佢又要再北上做骚，冇计啦！依家要养埋老婆，迟啲如果生多个，咁真系要努力搵定奶粉钱！