歐倩怡(Cindy)喺2006年同拍拖7年嘅郭晉安結婚，一心一意做郭太兼淡出娛樂圈，生咗一仔一女後，Cindy專心過住相夫教子嘅生活。淡出娛樂圈10年嘅Cindy，最近宣佈全面復出，為有線奇妙電視主持醫學節目《身·醫·管》。

曾經修讀營養學嘅歐倩怡，日前接受《蘋果》專訪表示，今次做主持有機會接觸好多醫學上知識，對佢嚟講可以趁機會溫故知新，歐倩怡話：「我諗搵我做呢個節目，都係睇中我10年前讀過營養學，其實醫學呢一科係好深奧，拍攝嘅時候，就好似打開咗我嘅課本咁，幫我溫書，而且亦有好多新知識學到。」

原來拍咗呢個節目之後，歐倩怡打算再繼續升讀營養學，準備今年9月開學，歐倩怡話喺屋企同仔女都有濃厚嘅學習氣氛，佢哋會特別開僻一個地方放書枱：「我哋有好長又好張大嘅書枱，有兩部大電腦，又擺滿咗我好多功課同Notes，仔女一個坐我左邊、一個坐右邊，大家各自溫書，佢哋做功課就有問題就可以問我。」

歐倩怡做咗家庭主婦多年，話再度復出要再熟習0依家娛樂圈工作生態，不過唔係太認識新一代藝人，究竟認得邊幾個藝人？佢諗咗一陣之後話：「我識岑麗香，跟住…仲有洪永城，唱歌嘅我識黎曉陽、雞蛋蒸肉餅，其實我主要係睇韓劇，最近期睇到《W》、《鬼怪》。」