卫诗雅操肌过度差啲冧低:就快有精神病!

卫诗雅昨日为2019东方表行沙田锦标“时尚煲呔赛马日”担任模特儿，身穿tube dress的她身形明显健硕不少，她解释近月为新戏的角色而操肌：“我个角色要好大只，同戏嘅男演员都好大只，虽然导演话我唔需要操，因为有衫着睇唔到手瓜，但我系一个好真实嘅演员，我搵咗个魔鬼教练帮我操肌，依家隔日操，操咗一个月。我寻日操完手臂，照镜时都惊，今日着晚装太大只，教练仲安慰我，今日就冇架喇，但明显唔系啦！下次着晚装前唔操手臂。”

诗雅表示要全身操弗，但由于运动量突然大增，加上睡眠不足及没有饮食配合，也差点受不了而病倒，新戏预计下月开拍，但仍有变数，她无奈说：“如果改期，可能拍另一套戏先，但另一个角色系弱质纤纤，但我依家练到咁大只，都唔知点算，就快有精神病，可能暂时唔操住。”

何广沛出席活动，佢话今次系第一次入沙田马场，觉得大开眼界。问到会否趁第一次入马场，发吓横财运？佢笑言：“我又唔识买，其实我连彩票都少买，我好惊输晒啲血汗钱！”

何广沛透露啱啱拍完剧集《爱美丽狂想曲》，11月即将放假，迎接忙碌嘅12月：“不过中间因为台庆，我谂都要返去彩排。（搵朱晨丽去旅行？）未谂呀，睇吓边个得闲。”佢透露12月头飞加拿大，月中飞杜拜，月尾留港开剧。问到会否提早庆祝圣诞节？他说：“好主意，咁又唔使出街食圣诞大餐咁贵，又唔使买礼物，样样都平啲。”

黄德斌以煲呔上阵，为2019东方表行沙田锦标“时尚煲呔赛马日”主持揭幕仪式，他表示因有不少朋友是马主，所以间中也会被邀到马场观看赛事和食饭，并自言很喜欢马匹：“我有去参观过澳洲嘅养马牧场，佢哋有专门嘅房间畀马匹繁殖下一代，好特别，光线同温度都有特定要求，仲豪华过人住嘅房。（你有冇兴趣做马主？）随缘，睇吓有冇朋友搵我一齐。”

德斌称因拍剧关系也略懂策骑，当年上了几堂课便要做出高难度策骑动作，幸好良驹很乖巧才顺利完成拍摄。讲到煲呔，他坦言隆重场合也会佩戴，而家中也有几个煲呔看门口以备不时之需。

至于工作方面，德斌谓之前拍毕一套电影，现处于休息状态中，提到上月是他的结婚周年，他透露跟太太到了日本旅行，笑言也算是补祝度蜜月。

唐诗咏以低胸连身裙出席2019东方表行沙田锦标“时尚煲呔赛马日”，见佢行路时小心翼翼，似担心走光，非常牙烟，她解释：“呢条裙大会畀我嘅，衬番‘煲呔’主题。（有冇做足安全措施？）有，我不嬲都好安全。（条裙松松哋？）可能瘦咗。”

佢解释近日收养咗只BB猫，每三小时就要喂奶，因而跌磅：“只BB猫仲有12日就两个月大，每日都要好早起身，朝早6点起身，依家我养三只猫，每日都轮住喂佢哋，依家好似奶妈。（唔可以一齐喂咩？）大会抢细嘅嘢食，所以要分开喂，好忙。”佢又透露仲想养多四至六只猫，当记者问到系咪冇时间拍拖，但佢未听完即话：“系咪生BB？我觉得如果生埋小朋友完全冇时间，其实只猫系陆永太太畀我。（唔叫陆永介绍男仔畀你？）信得过佢哋咩？我信唔过。（C君都结婚啦！）天颐好好心地。”

生B随时停工一年唔做嘢

佢又话今朝起身化妆整头，又要喂奶，已经觉得好唔得闲，问到佢第时生B会唔会停工唔做嘢？她说：“第一年都会想照顾佢，真系冇办法放低佢，我依家已经好挂住只猫，更何况系BB。”讲到佢同绯闻男友、“补习界王力宏”陈思铭感情，佢就话唔再多讲，唔系事实就唔好再讲人哋。

搵男友要过三只猫嗰关

佢话今日活动后要快啲返屋企睇猫，笑言依家出唔到街，识唔到人，问到只猫系咪阻佢桃花？她笑言：“佢可能系招财猫呢。”佢日后话识男仔要过三关：“要问我三只猫。（锺意宠物加分？）一定要锺意猫，试过带个男仔返屋企，我Feel到老嗰只猫“银仔”唔锺意，所以一定要佢哋锺意。”