楊埕話周勵淇同佢一樣係吃貨。

藝人楊埕（Sabrina）有份演出熱播劇《再創世紀》，成功入屋嘅佢日前獲一間時尚名店邀請拍攝廣告片，仲邀請佢出席活動兼幫手做司儀，Sabrina興奮表示：「我拍呢套劇係呢段時間做過最多人睇嘅嘢，雖然戲份唔多，但作為新人，多咗好多工作，宣傳同訪問，都多咗廣告商搵我，因為我個角色好深得人鍾意。」佢話有機會都想同無綫再合作：「始終唔係好識啲監製，會問吓朋友點樣可以認識佢啲，希望工作量多啲。」

楊埕拍《再創世紀》成功入屋。

Sabrina又話之前一直都喺內地拍《再》劇，所以對無綫嘅環境特別唔熟，尤其係Canteen，成日迷路搵唔到。佢話同劇中嘅蔚雨芯最老友：「成日對住友誼深咗，會一齊搵嘢食，搞到我愈拍愈肥。周勵淇都對我好好，傾有咩好食，初時都會覺得佢會唔會好難相處？原來一講到食，佢同我都會手舞足蹈，大家都係吃貨，又教我點演得好啲，相處好融洽。」

楊埕話佢依家工作量多咗！