黎芷珊姐姐2012年凭清谈节目《最佳男主角》在台庆颁奖礼获最佳主持奖，当中访问多位影帝级人马相当有睇头， 收视咁好当然要食过翻寻味，之后曾推出《最佳女主角》，而今年就推出《最佳拍档》，顾名思义要请过往观众心中经典荧幕拍档。

前几日第一集就请黎《巾帼枭雄》中的黎耀祥及邓萃雯， 1997年已经凭《西游记》角色猪八戒走红的黎耀祥就因觉得自己停滞不前，决定离开TVB转去拍电影，「正因为烂片无所谓，无人理你做成点，但嗰阵觉得几好，第一有钱收，开几日工（酬劳）亦好和味，好过TVB。」

入行初期大多数都系做配角的黎耀祥表示，决心离开TVB嘅原因是因为仔仔刚出生，「我觉得系命中注定，当时我拍第二辑《西游记》要到云南拍外景，我嗰仔当时出世10日我就走，我喺度谂点解我个仔出世我都要走呢，做呢行系咪要放弃家庭呢？虽然猪八戒好似好多人留意，但无好大嘅进步，我系TVB 13年都系原地踏步，俾多次猪八戒我做都系咁。」

节目芷珊姐姐亦提到黎耀祥好锺意换车，佢闻言后亦笑而不语并解释金钱观念唔强，「系唯一兴趣同唯一可以享受到，你谂下我系TVB日拍夜拍，无时间出去食一餐好嘅，无时间去旅行同做任何嘢。唯一可以做嘅就系揸车，返工同收工都可以做嘅得返呢嗰。我系可以着一件T-shirt着10几年，近年系因为工作需要先去买衫。」

佢之后仲透露有10年无离开过香港，「做嘢登台就唔计，同屋企人去旅行都系近年嘅事，对上一次旅行已经系我嗰仔2岁嘅时候，你谂下我15年无旅行，所以大家话我成日换车，但我可以做啲咩，仲可以有咩兴趣。」

入行30年嘅黎耀祥就话TVB教识佢点样去做人，「无人好似我咁行条演艺路，做 茄呢啡又几年，有几句对白又做几年，有几集戏又做几年。我唔系一嚟就做戏，因为每个阶段我都冷眼旁观过几年。」

至于19岁入行嘅邓萃雯，同黎耀祥嘅人生简直系相反，第一套剧《薛仁贵征东》就做女主角，收视仲要有60点。

当年佢亦曾经离开TVB，到台湾及亚洲电视拍剧，「所以人系要出去见下外面，唔可以净系匿喺度，有人话『鱼唔过塘唔会肥』我觉得系好，因为去过唔同地方，比较过之后，你就会学识珍惜TVB有嘅嘢。」