上得山多！陈家乐连接两部惊栗片濑嘢

近日凭无线剧集《逆缘》人气急升的陈家乐，最近可谓接Job接到手软，但基于要还电影债，故有些工作亦只能忍痛推却，家乐坦言工作的确不断，但却谦称并非赚好多。而早前他就一连接了两部惊栗片，其中一部讲述凶宅，饰演地产经纪的家乐因买卖凶宅，引来连串报复性恐怖事件，甚至祸害亲人及朋友。

家乐透露拍摄时也有Feel到唔妥，他谓：「场戏讲我拎住电话扫间屋有冇鬼，观众睇Mon会见到，但拍时系见唔到呢个特效，不过我就Feel到有人托我只手郁，仲以为系Crew，拍完仲大赞剧组醒，点知一拧后面原来冇人，就知自己濑嘢（好惊？）又唔惊，我冇做错嘢得罪佢，可能佢想我快快拍完离开，唔好阻住佢休息啫！」

掷20万说爱你！萧润邦送2卡钻戒冧爆江若琳

「生煎包王」萧润邦（Oscar）与未婚妻江若琳（Elanne）将于12月23日拉埋天窗，距离婚礼还余几个月时间，两人正为婚礼努力筹备，一向爱锡未婚妻的Oscar就藉住520（象征「我爱你」）的放闪日子，被撞破烟韧拣结婚戒指及520礼物！见到Oscar与身穿露肩上衣的Elanne从铜锣湾一间餐厅步出，两人身穿情侣装烂牛仔裤，过马路时Man爆的Oscar更搭住Elanne膊头，如连体婴般步入一间戒指店。

拉拉扯扯玩推手

两人一入店内，店员就即招呼他们，见两人依偎在一起，认真拣选橱窗内的戒指，期间见Elanne不时冧笑，似乎被Oscar凼得好开心。Oscar更将Elanne一拥入怀，之后两人更耍起花枪来，Oscar一时揿住Elanne的嘴，一时又捉住她条颈，Elanne又还拖玩推手，两人旁若无人地玩到扭作一团，见Elanne十分受落，被凼到哈哈大笑，认真Sweet爆！见两人很快就拣选到心水戒指，并即场戴上手试效果，似乎十分满意的他们又甜蜜大晒手上钻戒影相，之后又拿起一张纸合照，过多一会儿，两人很快就提住纸袋离开戒指店。

记者立即上前追访，Elanne见到记者即尴尬大笑，但两人大方透露是来拣戒指，Oscar坦言：「我拣咗个Design，呢度就帮我造咗一只呢个Design嘅戒指。（你自己设计？）我大概知道佢想要啲咩，其实都唔系设计，系网上睇吓大概感觉系点。」他透露结婚钻石戒指价值6位数字，Elanne即笑言：「但我唔介意每年加1卡。」Oscar亦谓这间店的戒指男士一生人只可买一次，Elanne亦谓男士要签纸证明一生只可在这买一次，笑言：「如果佢要买第二只过主啦。」闻言Oscar即揿住Elanne的嘴，两人又当众在街头耍花枪。据知Oscar买了5位数的钻石结婚戒指，还加码十几万多买了一只逾两卡的钻戒为「520」礼物，花20万博红颜一笑。

兄弟姊妹团未定

讲到婚礼筹备情况，他们表示大致OK，只是搵兄弟姊妹团有些复杂，但因为他们认为婚礼是大家来聚一聚，故不用太铺张。谈到婚纱，Elanne表示已定好款式，但Oscar要结婚当日才会见到，问到是否太性感不能让他见到？Oscar笑言：「有一Part佢嗰件婚纱净系着畀宾客睇，唔系着畀我睇，因为惊我闹佢。」

伦敦庆祝完返香港洗米华生日活动行程紧凑？

三年前嘅5.20，名模Mandy Lieu喺英国为澳门赌业猛人周焯华（洗米华）诞下女儿，噚日中午约十二时半，周焯华从英国伦敦飞抵香港，以一贯黑色衣着装束衬白Tee，孭上黑背囊独自步出禁区，全程低头不停睇电话。洗米华与Mandy嘅女儿喺三年前嘅520出世，而洗米华就于30日生日，可以一齐庆祝。

当记者上前打招呼时，洗米华望咗一眼便放慢脚步俾记者影相，问到此行系咪去完伦敦跟Mandy Lieu预早为囡囡庆祝生日？佢笑一笑冇回答。再问到近日有传有赌客借其公司集团及其名义集资，洗米华未有回应。

下星期三（30日）就系洗米华生日，问到仔女有冇安排庆祝活动？洗米华同样未有答覆，最后临步出机场大楼前，佢向记者说声「唔该晒。」然后往停车埸登车离开。

刘恺威公开给小糯米的信　眼湿湿多谢阿女

艺人刘恺威与内地著名花旦杨幂嘅爱女「小糯米」依家差不多4岁，小糯米喺香港读书香港大，不过老窦同妈咪就长年喺大陆做嘢，冇咩时间陪囡囡，不过佢哋感情依然非常深厚，最近刘恺威上一个大陆歌唱节目，仲公开一封「给小糯米的信」，一提到阿女仲内心激动眼湿湿想喊添！

刘恺威喺节目上深情献唱《给宝宝的信》，睇个歌名就知系唱畀个女听，唱到尾留段，荧幕上仲公开一封给小糯米的信：「To米米最初是希望带着你了解这个世界，却发现是你陪着我重新认识了这个世界，谢谢你。」真系Sweet到爆！

刘恺威续表示自己经常在家唱歌畀小糯米听，又多次向女儿致谢，虽然每次做嘢都不舍离家，但系为咗更好地照顾女儿都冇办法，又感谢囡囡帮助父母成长成更好的生命，讲讲吓仲几度欲落泪，场面感人又温馨。提到当时喺产房睇住个女出世、剪脐带，刘恺威自爆自己一定要囡囡个初吻，所以小糯米出世后一抹完身，佢就即刻锡锡阿女圆心事。

复合？容祖儿刘浩龙孖住为黄伟文庆生

「潮流界巨头」黄伟文（Wyman）今日49岁生日，相识满天下嘅佢，过去一个星期已经陆续收到唔同界别送嘅生日礼物，噚晚佢一班幕前幕后圈中好友，搞咗珠片之夜庆祝生日，Wyman喺ig贴相兼留言「七七四十九岁！珠片之夜！多谢大家！」

噚晚出席生日饭约有20人，除咗Wyman医生密友吴伟民（Stephen），仲有吴君如同陈可辛夫妇、邓萃雯、郑欣宜、王菀之、薛凯琪、邹凯光等等。不过，最吸引目光，一定系早前惊爆5年情玩完嘅容祖儿同刘浩龙（师兄），两人不但同场现身，仲身贴身咁企埋一齐添喎！

祖儿因为签証过期，无法去美国出席好姊妹锺欣潼婚礼，佢噚晚去咗Wyman生日派对，今日凌晨喺ig贴相，除咗一张佢嘟嘴作状锡寿星公Wyman，仲有几张大合照。

噚晚系「珠片之夜」，宾客个个都贴题着到闪靓靓，但亮点一定系祖儿同师兄。从相片所见，祖儿企嘅位置应该系Wyman左边身后，Wyman侧边有王菀之，王菀之身后就系师兄，之但系祖儿每张相都将半个身向前「摄」，表面睇就好似喺Wyman同王菀之中间，但其实不难发现佢同师兄，其实一直都有身贴身企埋一齐。

自祖儿同师兄传分手后，两个都唔肯正面回应，惟上月师兄喺麦花臣开骚，祖儿又大方现身撑场，噚晚又孖住去Wyman生日会，究竟两位系掟煲唔掟盖，定系根本未掟过，真系为师兄早前个唱宣传呢？！

孖女狂晒旧相　梁家辉揽老婆庆祝结婚31周年

影帝梁家辉喺圈中向来都系出咗名嘅模范爸爸，一有时间就会陪老婆江嘉年同一对孖女梁颖晨（Chloe）同梁静禧（Nikkie），一家四口可谓幸福满泻！寻日正正就系老婆生日，仲要系佢同老婆结婚31周年，佢就同一对孖女准备咗惊喜同老婆庆祝。Nikkie同Chloe喺社交网上晒咗多张佢哋庆祝嘅相，一对孖女仲亲手整咗个蛋糕畀佢哋，相中梁家辉揽实老婆，捉住对方手仔齐齐切蛋糕，又搞笑伸脷想锡锡，认真sweet到晕呀！

Nikkie同Chloe除咗大晒佢哋sweet到漏咁切蛋糕外，两姊妹仲狂晒父母过往恩爱生活同摆江嘉年后生啲相，就连当年结婚摆酒嘅相都甫埋出嚟，可以话呢辑相真系相当珍贵呀！