陈自瑶（Yoyo）猴年成功捞过主持界，于年初二播出的玄学节目《新春开运王》中担任主持，鲜有接触主持工作的她更指今次经验获益良多，盼望新一年能有更多机会参与综艺节目及主持工作：“我之前都系拍剧多，好少接触主持工作，今次可以同芷珊姐姐（黎芷珊）同咁多位玄学大师合作当然学到好多嘢，今年新年愿望都想有多啲机会做吓综艺节目同主持。”至于Yoyo有份演出、同样于年初二首播的剧集《公公出宫》，她将以泼辣形象示人，笑说：“《公公出宫》入面我饰演一个好巴渣泼辣嘅大奶奶，同我之前做嘅好唔同，希望出街之后啲人唔会憎到想打我啦！”
婚后拒放弃自己

继歌手谢安琪自当人妻后升呢为网民心中的“永远荣誉女神”，于2011年下嫁艺人王浩信的Yoyo近期亦顺利上位，成为新一代“索爆人妻”！现年34岁的Yoyo虽然已为人母，但仍keep到靓样好身段，问她有何心得？她表示：“我本身都好想keep好个形象，唔想一结婚就放弃自己。始终依家时代唔同，唔系嫁咗就代表唔可以有自己事业，再加埋我做幕前，对自己外形各方面都要好有要求，如果唔系就好难再有人搵你做嘢。咁样亦令自己多咗自信，有事业目标，人都靓啲！”

为囡囡身教示范

谈及女神定义，Yoyo直言除五官外，气质、个人修养亦为重要因素，但现阶段则未有刻意培养女儿王靖乔的谈吐和礼仪：“我觉得靓未必系每个五官都生得好精致好端正，反而系成个配搭够顺眼，咁当然气质、内涵修养都好紧要！但我就冇刻意教囡囡呢啲，上咩礼仪堂咁夸张，最紧要系礼貌、识尊重长辈，由呢点慢慢跟住我去学，其他嘢就由佢自由发挥，又唔使话行晒catwalk咁嘅！”