數番歷史，卿卿喺1985年參加第一屆亞洲小姐選舉，獲得季軍（當年冠軍係黎燕珊），同時獲得「最健美小姐」同「最有性格小姐」。

其後佢喺亞視接拍《金鳳凰》同《中華英雄》等劇集，但星途一般，之後卿卿喺1991年離開公仔箱，並應邀接拍性感寫真，呢個決定成為其演藝事業創下轉捩點，同年卿卿進軍大銀幕，接拍首套三級片《情不自禁》，其他名作仲有《卿本佳人》、《我為卿狂》。

翌年（1992）卿卿加入佢哥哥葉志銘創立嘅飛圖唱片，踩入樂壇，處女作《擋不住的風情》更令佢喺樂壇一炮而紅，之後推出過《全部給你》等唱片，佢亦攞過樂壇頒獎禮嘅新人獎。

到1993年，卿卿憑《天台的月光》同《玫瑰玫瑰我愛你》成功轉型，脫離三級女星行列，其中佢仲憑《天台的月光》喺第30屆金馬獎同第15屆香港電影金像獎內獲提名「最佳女主角」。

1994年，卿卿憑關錦鵬執導嘅《紅玫瑰白玫瑰》提名第31屆金馬獎最佳女主角。

卿卿自1995年起已減少幕前演出，佢喺1996年識咗美國華裔商人胡兆明後墮入愛河，並喺1998年結婚，卿卿先後為胡家誕下1女2子，分別係大女胡芷欣（Victoria）、囝囝可聰同細仔以聰。

其實卿卿入行以嚟緋聞唔算多，入行時同過張立基拍拖，離合多次後分手收場；到1987年同伍衛國拍拖，3年後玩完，再之後分別同過髮型師Boffy，以及拿督羅樹聲發展，唯最終戀情冇開花結果。

至於卿卿老公兆明，雖然曾經捲入欠債風波，但卿卿2012年為咗拍《2013我愛HK恭囍發財》接受本報專訪時就講過，老公啲超巿同銀行都健在，而卿卿平日喺屋企其實好忙，要照顧屋企1大3細嘅起居飲食：「（屋企）塊地12畝，我就好似經理咁，要管理所有嘢，水電、維修乜都關事，好攰㗎！雪櫃都有8個，壞1個都要搵張單修理。」聽到都已經頭暈…… 

.