打足17年！阿Sa游埃及　High爆打侧手翻

又拍戏又唱歌嘅蔡卓妍（阿Sa）终于有时间放假去旅行，佢今次仲拣咗个梦寐以求嘅地方，就系埃及喇！佢喺Instagram上载独照，仲好感触话「圆梦第一步」：「实在唔知道用咩言语嚟形容自己嘅心情！！由细到大都对远古文明深感兴趣一直都好想亲身去睇吓感受吓」仲有好多hashtag，自嘲词穷唔识得点形容有几开心！

唔知点讲？佢就以行动证明有几兴奋呀！佢喺金字塔面前打侧手翻，仲配埋2001年Twins出道歌有呢个招牌动作嘅《明爱暗恋补习社》做配乐。见佢驾轻就熟，轻轻松松面不改容，果然训练有素！网民都话好经典「谂起你哋第一个演唱会个侧手翻」，仲笑言「宝刀未老」，等佢打到80岁呀！

劲洗脑！「皇帝」黎明丧闹人废柴

内地网剧《将夜》最近正在热播，更邀请到天王黎明（Leon）、郑少秋、胡军等大卡士演员客串演出，而男主角则由一位18岁嘅男新人主演，佢系导演陈凯歌个仔！

虽然Leon戏份唔多，但讨论度最高嘅，竟然系Leon于剧入面嘅对白。Leon饰演唐王李仲易，佢不时都用「废柴」一词嚟闹一众大臣，好多网民都质疑古装戏竟然会有「废柴」咁新潮嘅用词，亦有部分网民话畀佢呢句「废柴」洗咗脑，每集嘅乐趣变成数吓佢一共讲咗几多次「废柴」。

「登陆」NASA狂洗版　G.E.M.首晒男友密照

G.E.M.（邓紫棋）日前「登陆」美国太空总署（NASA）位于硅谷兴建嘅Ames研究中心，出席颁奖礼兼献唱！威到尽嘅佢连日嚟都喺Instagram洗版分享集邮成果，包括美国乐坛歌王Lionel Richie、型男奥兰度布林（Orlando Bloom）等巨星，洗咗咁耐终于嚟到最后一张相，就系佢首次晒出同造型师男友Mark合照，Mark轻揽对方纤腰，真系闪到盲！G.E.M.留言：「最后一张～Styled by @markymark.23 #lastbutnotleast（最后但同样重要的人）」

获女友亲证地位嘅Mark亦不断上载「男友视角」片段隔空传情，网民都纷纷送上祝福，又叫Mark要好好照顾G.E.M.呀！而「邓紫棋首晒男友」更登上微博热搜第一位添！

傍住姜皓文现身　惠英红自爆失声

「影后」惠英红与姜皓文（黑仔）在金钟出席《香港亚洲电影节2018开幕礼》，两人演出的电影《翠丝》属今届开幕电影之一。姜皓文在戏中饰演跨性别人士，问他心情紧张吗？他笑说：「有红姐喺度，定过抬油呀。」提及最近再以女装上阵兼剃脚毛拍照，他说：「自己睇女仔都系睇对脚先，所以剃咗脚毛会好睇啲，唔痛，剃好方便、好快。」惠英红又爆拍戏时黑仔不时做Facial扮靓，黑仔笑言：「系呀，早晚都敷个Mask，系靓仔啲，依家都Keep住做。」

惠英红最近为舞台剧排练，因要大嗌而导致喉咙痛，近日要尽量减少说话，为另一个内地骚好好养声，她说：「自己排舞台剧又唔识就住，不断咁嗌，今日把声开始出事。」