今年系TVB 50周年，唔经唔觉无綫已经陪观众过咗半个世纪！而喺呢50年，TVB除咗捧红唔少巨星，仲造就咗唔少神剧，当中好多难忘嘅场口同画面到依家都不时畀网民拎出嚟回顾，甚至连TVB嘅新剧都会用嚟致敬一番，果然系经典中嘅经典！

谢天华《神枪狙击》单手攀岩

要数神剧，梗系唔可以唔提TVB嘅警匪片啦，因为呢类剧集紧张刺激，加上有大量动作同爆破等场口，超级吸睛！而2013年嘅剧集《神枪狙击》就因为一啲角色神乎其技嘅身手，而被网民力捧成神剧！

剧集入面，谢天华饰演一个身手好好嘅神枪手，佢有型有款，加上可以一个打十个，成功迷倒万千少女！而单系佢出场嘅一幕，就已经成为经典！皆因谢天华一出场就喺度攀紧岩，期间仲因为要接电话，而用单手捉住岩石添！单手爬山嘅谢天华喺冇任何安全措施嘅情况下，都可以Chok住咁讲电话，简直系挑战人体力学嘅极限，难怪会成为网民心目中嘅经典啦！
郑嘉颖《铁马寻桥》失控咆哮

一套剧集要成功，好多时都系要靠天时地利人和，要剧情好、演员演得好，仲要对准观众嘅口味！但系有啲时候，可能只系一个表情，就足以令大家永远都记住呢套剧！

2010年嘅剧集《铁马寻桥》，系一套讲用武术重振家声嘅民初剧，剧集搵嚟较少拍剧嘅元秋，加上有好多动作场口，同埋好多惨绝人寰嘅情节大派洋葱，成为当时嘅热话！不过要讲到最抢镜嘅，相信就系男主角郑嘉颖啦！佢喺剧入面细个嗰阵畀人拐走咗，大个重聚之后又要为家族报仇，所以情绪非常复杂！当中佢失控落泪咆哮嘅一幕，更加放咗系主题曲入面，令观众每晚都听到郑嘉颖凄厉嘅叫声，成功感动观众！好多网民亦Cap低咗呢个画面，一嬲嘅时候就会用佢嚟表达心中嘅不满，直到依家都不时会见到呢个经典画面！

苗侨伟《赌场风云》四条A

TVB历年来都有好多破格嘅剧集，题材亦非常多变，当中2006年嘅剧集《赌场风云》就系成功例子之一！

剧集少有咁以赌场做背景，加上有唔少好戏之人，好似宣萱、欧阳震华、许绍雄同苗侨伟等坐镇，吸引好多观众追看！当中最经典嘅，就系苗侨伟所饰演嘅乔正初！佢喺剧入面系一个为咗赢而不择手段嘅赌神，最后因为轮咗畀宿敌欧阳震华，而面临崩溃！苗侨伟喺入面七情上面，面容扭曲到连眼都凸埋，最后因为接受唔到自己手牌咁好都输，而爆出嘅一句：“我四条A！”，更加成为网民心目中嘅金句！而苗侨伟传神嘅演绎仲被网民整成GIF动图，不断咁流传！

马德钟《洪武三十二》鞭打本王

TVB嘅古装剧一向有保证，有啲甚至受欢迎到翻拍完再翻拍，好似《十兄弟》咁，可想而知古装剧嘅威力！而2011年嘅剧集《洪武三十二》，相信系网民心目中嘅经典古装剧之一。

剧集讲到明朝嘅帝位之争，而且牵涉到锦衣卫同间谍等情节，相当紧凑！不过最深刻嘅，就系剧中有好多大胆嘅画面，令观众大饱眼福。其中，饰演燕王嘅马德钟因为要令饰演沈千三嘅徐子珊相信佢系真傻，而赤祼上身，趴喺床上，仲要求徐子珊用皮鞭鞭打自己！可能因为意识大胆，超越咗一般嘅电视尺度，所以引起网民热烈讨论，仲令当中一句“本王罪孽深重，求你鞭打本王”成为咗金句添！

关礼杰《叛逃》跳天台

TVB50周年台庆剧《夸世代》早前热播，剧中除咗以超夸张剧情同超强客串阵容做卖点之外，更加会拎番一啲自家剧集嘅经典桥段嚟“抽水”，当中最瞩目嘅就系陈豪跳天台一幕！

其实呢个桥段系出自2014年嘅剧集《叛逃》嘅，剧入面关礼杰系一个训练警员嘅教官，所以身手都有番咁上下。而其中一集，佢就同警员进行跨楼跳跃特训。关礼杰首先助跑冲上天台边，然后一跳就飞咗过去相隔成条马路嘅对面天台！咁都未算最劲，剧入面第一次进行训练嘅陈展鹏只系急速行咗几步，就成功飞咗过对面天台，简直能人所不能！

而喺《夸世代》入面，陈豪就冇咁好身手啦，佢虽然勉强都叫跳到出去，但最后就好不幸咁跌咗落楼！

刘江《拳王》讲呢啲

近年好多题材“贴地”嘅剧集，都会因为有共鸣而受得观众喜爱，近年嘅《降魔的》就系一个好例子！不过除咗剧情之外，原来演员嘅演出够“贴地”都好重要！

艺人刘江就因为一个够“贴地”嘅表情，而畀网民Cap图，仲因为咁而成为咗网络红人！刘江喺2012年嘅剧集《拳王》入面，做咗一个腼腆笑样，畀眼利嘅网民留意到，将入面嘅对白改咗做“讲呢啲”，充分咁表达出呢个表情嘅深层意思，亦因为呢句说话成日都会喺现实生活中应用到，而被网民广泛流传！

而刘江喺呢句潮语爆红之后，都有亲身将金句神还原，就连喺攞“杰出演员大奖”嘅时候，旁白都用“讲刘江，唔可以唔讲呢啲”嚟介绍佢，证明呢句金句已经成为佢嘅代表作！

姚子羚《与敌同行》表哥眼

剧集之所以成功，演员固之然系重要嘅一环。若然演员本身有吸引力，自不然会吸引观众追看。不过人红自然是非多，甚至引嚟网民嘅恶搞，最后成为网上热话！

要数恶搞对象，艺人姚子羚都算系经典嘅一个，好多网民都会将佢嘅相改图，刻意咁将佢对眼大幅度咁缩细，暗指佢眼细！而喺2008年嘅剧集《与敌同行》入面，就因为有网民用咗佢嗌表哥嘅一幕嚟改图，而令姚子羚获封表哥嘅称号！“表哥眼”称号一出，令网民更加疯狂改图，时至今日，每当姚子羚有新剧出，网上都会流传嗰部剧集嘅“表哥眼”改图，威力非常惊人！

而姚子羚面对住呢啲恶搞图，都依然好大方，仲喺回应网民时自称表哥，获得一班网民大赞！