挑機林作？何浩文懶理負評照關心麥明詩

「十優港姐」麥明詩（Louisa）嘅律師男友林作日前被影到同女性朋友Victoria（余穎洋）夜蒲銅鑼灣「斷正」，兩人戀情因而傳出危危乎，近日仲盛傳分手添！

呢一邊廂男友唔生性掛住撩女仔，另一邊廂Louisa就忙到甩轆！備受無綫力捧嘅佢，最近忙於同「鴨王」何浩文（Dominic）拍無綫重頭劇，兩人喺劇中飾演夫婦。唔知係咪太入戲嘅關係，Dominic對Louisa處處盡顯關心，仲當正Louisa係女友咁狂Post佢啲相，因此爆出佢力追10A港姐嘅傳聞。之不過，一班網民似乎都唔Buy Dominic嘅舉動，紛紛畀出負評，佢哋仲留言鬧爆Dominic博宣傳…想挑機大律師林作嘅地位？似乎仲爭好遠喎！

雖然網友唔Buy，不過一向我行我素嘅Dominic一於懶理，繼續展開「抽水Mode」！佢呢日上載咗一張同Louisa嘅合照，並留言：「嗰日邊個會估到有人貢（咁）精神，影完相笑完玩完，下一刻突然會哮喘發作，嚇到我咇咗兩粒尿！哈哈哈哈…小心身子啦以後。」公開話自己好擔心Louisa哮喘發作，Dominic真係完全唔避嫌，睇嚟林作都係要睇緊啲女友喇。

可以点原文看更多猛料，也可以畀台叔一颗充满爱的赞~